Beborg

Vun Wikipedia
Wapen/Flagg Koort

Wapen vun Beborg

Beborg
Laag vun Beborg in Düütschland
Basisdaten
Bundsland: Neddersassen
Landkreis: Horborg
Gemeen: Winsen
Inwahners: 780 (2014-06-3030. Juni 2014)
Postleettall: 21423
Vörwahl: 04173
Geograafsche Laag:
Koordinaten:53° 18′ N, 10° 11′ O
53° 18′ N, 10° 11′ O

Karte

Beborg (hoochdüütsch Bahlburg) is en Dörp in de Gemeen Winsen in’n Landkreis Horborg, Neddersassen. De Oort billt binnen de Gemeen Winsen en Oortschop mit egen Oortsvörsteiher.

Geografie[ännern | Bornkood ännern]

Beborg liggt op de Toppenstäer Geest, wat to de Lümbörger Heid tellt. Dör den Oort flütt de Luh (Luhkanaal) un de Aubeek. In’n Süüdwesten von dat Dörp liggt dat Naturschuulrebeed Bebörger Brook, in’n Noordwesten de Lassbrook un in’n Noordoosten dat Hoge Holt.

De Naveröörd sünd Luhdörp un Radbrouk in’n Noordoosten, Eenhoff un Veerhöben in’n Süüdoosten, Gastää in’n Süüdwesten, Wulfsen in’n Westen un Parrns in’n Noordwesten.

Historie[ännern | Bornkood ännern]

Beborg kummt an’n 26. Februar 1312 as Padelenborgh toeerst in en Oorkunn vör, in de de Hartog Otto II. von Bruunswiek-Lümborg den Abt Thomas von dat St.-Michaelis-Klooster in Lümborg en Hoff in Beborg gegen en Hoff in Wriel bi Ebstörp överlett.[1]

In’n Dörtigjohrigen Krieg is 1626 von däänsche Truppen toeerst en Hoff in Beborg in Brand steken worrn un an’n 22. Januar 1627 ok de Amtsmöhl in Beborg.[1] An’n 21. Juni 1627 hebbt de däänschen Truppen denn aver dat ganze Dörp mit acht Hööv afbrennt.[1] In dat sülve Johr is ok noch de Pest utbraken un en Reeg Lüüd in Beborg sünd dor an doodbleven.[1]

In’n Eersten Weltkrieg sünd twölv Soldaten ut Beborg fullen oder vermisst un in’n Tweten Weltkrieg 37.[2]

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer dat in’n Kreis Winsen un is 1932 Deel von’n Kreis Horborg worrn.

De Oort is an’n 1. Juli 1972 mit de Gemeenreform in Neddersassen Deel von de Gemeen Winsen worrn.

Inwahnertall[ännern | Bornkood ännern]

Johr Inwahners
1793-00-001793[3] 13 Füürsteden
1812-00-001812[4] 119
1824-00-001824[5] 13 Füürsteden
1848-00-001848[6] 166 Lüüd, 21 Hüüs
1871-12-011. Dezember 1871[7] 161 Lüüd, 25 Hüüs
1910-12-011. Dezember 1910[8] 187
1925-00-001925[9] 224
1933-00-001933[9] 224
1939-00-001939[9] 230
2014-06-3030. Juni 2014 780

Religion[ännern | Bornkood ännern]

Beborg is evangeelsch-luthersch präägt un höört to dat Kaspel von de Gertrud-Kark in Parrns.

För de Kathoolschen is de Goden-Hirt-Kark in Winsen tostännig.

Wapen[ännern | Bornkood ännern]

Dat Wapen von Beborg wiest baven op gollen Grund en blauen Lööw mit rode Tung un rode Klauen, de schriddt, un ünnen op roden Grund en sülvern Borg.

De Lööw is de Bruunswieker Lööw, von wegen dat de Oort fröher to dat Hartogdom Bruunswiek-Lümborg tohöört hett.

Oortsvörsteihers[ännern | Bornkood ännern]

  • opstunns: Ulrike Hermann

Kultur[ännern | Bornkood ännern]

In Beborg steiht en Denkmaal för de Fullenen ut de twee Weltkrieg’.

Weertschop un Infrastruktur[ännern | Bornkood ännern]

Sprüttenhuus mit Schlauchtoorn

Beborg hett en egene freewillige Füürwehr, de an’n 1. April 1935 grünnt worrn is. Vörher hett dat al en Plichtfüürwehr geven.

Siet 2013 löppt de Eerdgas-Pieplien NEL in’n Noorden twüschen Beborg un Luhdörp langs.

Verkehr[ännern | Bornkood ännern]

Dör Beborg löppt de Kreisstraat 37, de in’n Süüdoosten över Veerhöben na Westergellsen an de Landsstraat 216 ran geiht un de in’n Noordwesten dicht bi Beborg de L 234 krüüzt un na Parrns an de L 215 ran geiht. De L 234 wedder löppt in’n Noordoosten över Luhdörp un Reidörp na Winsen un in’n Süden na Gastää un Solzhusen.

De nächste Autobahn is de Autobahn 39 (Afsnidd HamborgLümborg). De Opfohrt 3 Winsen-West liggt so söven Kilometer in’n Noordwesten von Beborg an de K 8 un de Opfohrt 4 Winsen-Oost söven Kilometer in’n Noordoosten an de K 78. De Opfohrt 39 Thieshoop op de Autobahn 7 (Afsnidd HamborgHannover) liggt acht Kilometer in’n Westen.

De nächste Bahnhoff is so bi söven Kilometer wied weg in’n Noordoosten de Bahnhoff Winsen an de Bahnlien Hamborg–Hannover. Von 1874 bet 1981 hett dat ok Personenverkehr op de Bahnlien Wittenbarg–Bookholt geven, de direkt an dat Dörp langslopen is. In de eerste Tied weer de nächste Bahnhoff veer Kilometer in’n Westen in Wulfsen (dor ok Ansluss an de Bahnlien Winsen–Hützel). 1912 hett denn ok Beborg en egen Bahnhoff kregen, de en Stück in’n Süden von dat Dörp leeg.

Footnoten[ännern | Bornkood ännern]

  1. a b c d Die Geschichte von Bahlburg
  2. http://www.denkmalprojekt.org/dkm_deutschland/bahlburg_ns.htm
  3. C. B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 13: https://books.google.de/books?id=jN5QAAAAcAAJ&pg=RA1-PA13
  4. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 62: http://books.google.de/books?id=Q 5OAAAAcAAJ&pg=PA62
  5. C. H. Jansen: Statistisches Handbuch des Königreichs Hannover. 1824, Sied 34: http://books.google.de/books?id=tG0AAAAAcAAJ&pg=PA34
  6. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 104: http://books.google.de/books?id=eOI-AAAAcAAJ&pg=PA104
  7. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 132: https://books.google.de/books?id=qTZDAQAAMAAJ&pg=RA2-PA132
  8. http://www.gemeindeverzeichnis.de/gem1900/gem1900.htm?hannover/winsen.htm
  9. a b c http://www.verwaltungsgeschichte.de/harburg.html

Weblenken[ännern | Bornkood ännern]

Beborg. Mehr Biller, Videos oder Audiodateien to’t Thema gifft dat bi Wikimedia Commons.