Heerst

Vun Wikipedia
(wiederwiest vun Heerstedt)
Wapen/Flagg Koort

Wapen vun Heerst

Heerst
Laag vun Heerst in Düütschland
Basisdaten
Bundsland: Neddersassen
Landkreis: Cuxhoben
Gemeen: Beverst
Flach: 18,89 km²
Inwahners: 453 (2010-12-3131. Dezember 2010)
Inwahnerdicht: 24 Inwahners pro km²
Hööchd: 11 m över NHN
Postleettall: 27616
Vörwahl: 04747
Geograafsche Laag:
Koordinaten:53° 28′ N, 8° 46′ O
53° 28′ N, 8° 46′ O
Grenzen bi OSM: 1528301 1528301
Wellen (Landkreis Cuxhoben)KarkwistBeverst (Oortschop)AppelnFrellsdorpHollen (Gemeen Beverst)Stubben (Landkreis Cuxhoben)HeerstLuunstBokel (Landkreis Cuxhoben)Wolljes
Laag von Heerst in de Gemeen Beverst (Koort lett sik anklicken)

Karte

Heerst (hoochdüütsch Heerstedt) is en Dörp in de Gemeen Beverst in’n Landkreis Cuxhoben, Neddersassen.

De Oort billt binnen de Gemeen Beverst tohoop mit Dohren un Loh de polietsche Oortschop Heerst.

Geografie[ännern | Bornkood ännern]

De Oort liggt op de Wersermünner Geest. Dat Water ut dat Rebeed flütt över’n Stinster Beek, Loher Beek un Dohrener Beek na de Luun hen af. In’n Süden liggt dat Naturschuulrebeed In’n Huusbeeken un in’n Noordoosten dat Naturschuulrebeed Bülter See.

De Naveröörd sünd Wehdel un Loh in’n Noordoosten, Dohren, Heyerhöben un Wachholt in’n Süüdoosten, Westerbeverst in’n Süden, Freeschluunbarg un Düring in’n Süüdwesten un Stinst un Donnern in’n Noordwesten.

Historie[ännern | Bornkood ännern]

Windmöhl in Heerst
Gedenksteen to’n Brand- un Loffdag

To de öllsten Funnen ut Heerst höört de Steenkist von Heerst ut de Bronztied, de 1938 opdeckt worrn is.

Heerst kummt in dat 12. Johrhunnert toeerst in de Oorkunnen vör.

An’n 18. Juni 1817 hett dat en sworen Brand in dat Dörp geven. Dorbi sünd över 50 Gebüüd afbrennt, aver Minschen sünd nich doodbleven. Na’n Brand is dat Dörp nich wedder as Hupendörp opboot worrn. De Hüüs stünnen nu vör allen langs de Schossee, de hüdige Bundsstraat 71. An düssen Dag warrt sietdem elk Johr in Heerst de Branddag fiert, de siet de Johren 1950 mit’n Loher Loffdag to’n Brand- un Loffdag tohoopleggt is.

Bi dat Dörp steiht de Windmöhl Heerst, de 1867 boot un bet in de Johren 1970 lopen is. Dor is vondaag en Wahnhuus un en Café in.

In’n Eersten Weltkrieg sünd 13 Soldaten ut Heerst fullen oder vermisst un in’n Tweten Weltkrieg 30.[1]

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Beverst in’n Kanton Beverst höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1851 to de Huusvaagdie Bexhöv in dat Gericht Beverst tohöört, von 1851 bet 1859 to dat Amt Beverst un denn von 1859 bet 1885 to dat Amt Leh. Na 1885 weer dat in’n Kreis Geestmünn. 1932 is dat Deel von’n Kreis Wersermünn worrn un 1977 von’n Landkreis Cuxhoben.

De Oort weer lange Tied en egen Gemeen, to de mit’n 1. April 1929 ok de beiden vörher egenstännigen Gemenen Dohren un Loh mit tohöört hebbt. De Gemeen Heerst weer von 1971 bet 2011 Maat von de Samtgemeen Beverst. Gemeen un Samtgemeen sünd an’n 1. November 2011 oplööst worrn un dor is de Eenheitsgemeen Beverst von billt worrn. Binnen de Gemeen billt de Oort nu tohoop mit Dohren un Loh de Oortschop Heerst mit egen Oortsvörsteiher.

Inwahnertall[ännern | Bornkood ännern]

Johr Inwahners
1791-00-001791[2] 29 Füürsteden
1812-00-001812[3] 132
1824-00-001824[4] 29 Füürsteden
1848-00-001848[5] 164 Lüüd, 24 Hüüs
1871-12-011. Dezember 1871[6] 169 Lüüd, 28 Hüüs
1885-12-011. Dezember 1885[7] 185 Lüüd, 31 Hüüs
1905-12-011. Dezember 1905[8] 170 Lüüd, 30 Hüüs
1910-12-011. Dezember 1910[9] 193
1925-00-001925[10] 262
1933-00-001933[10] 362*
1939-00-001939[10] 354*
* tohoop mit Dohren un Loh

Religion[ännern | Bornkood ännern]

Heerst is evangeelsch-luthersch präägt un höört to dat Kaspel von de Fabian-un-Sebastian-Kark in Beverst.

För de Kathoolschen is de Johannes-de-Döper-Kark in Lox tostännig, de 1965 grünnt worrn is. Vör 1965 weer de Nikolaus-Kark in Wulsdörp tostännig. De Johannes-de-Döper-Kark höört siet 1. November 2006 to de Karkengemeen Hillig Hart Jesu in Geestmünn.

Dat Dörp hett en egen Karkhoff an de Straat Na’n Kleverblock. Bevör de Karkhoff anleggt worrn is, sünd de Doden bi de Kark in Beverst begraven worrn.

Wapen[ännern | Bornkood ännern]

Dat Wapen von Heerst wiest op blauen Grund över en gollen Barg mit en swarte Holtschaal mit Tiernagels in’n Schildfoot dree gollen Ruten.

Dat Wapen hett de Heraldiker Albert de Badrihaye utklamüsert. De dree Ruten staht för de dree Öörd Heerst, Dohren un Loh, ut de de fröhere Gemeen billt worrn is. Barg un Holtschaal staht för Funnen ut de Steenkist von Heerst.

Oortsvörsteihers[ännern | Bornkood ännern]

  • opstunns: Manfred Tönjes (CDU)

Kultur[ännern | Bornkood ännern]

In Heerst steiht en Denkmaal för de Fullenen ut de twee Weltkrieg’.

Von 1979 bet 2016 hett dat in Heerst de Discothek KASBA music-hall geven.

Verenen[ännern | Bornkood ännern]

Dat gifft in dat Dörp den Sportvereen TSV Heerst.

Weertschop un Infrastruktur[ännern | Bornkood ännern]

Heerst hett en egene freewillige Füürwehr, de 1887 grünnt worrn is.

Verkehr[ännern | Bornkood ännern]

Dör Heerst löppt de Bundsstraat 71, de in’n Noordwesten över Bexhöv na Bremerhoben-Wulsdörp geiht un in’n Oosten över Beverst un Basdaal na Bremervöör. Na Süüdwesten geiht von de B 71 de Kreisstraat 45 af, de över Freeschluunbarg un Hollen na Wittst un an de Landsstraat 135 ran föhrt. En lüttjere Straat gifft dat noch över Loh na Wolljes an de L 128.

De nächste Autobahn is de Autobahn 27 (Afsnidd BremenBremerhoben). De Opfohrt 9 Wulsdörp liggt negen Kilometer in’n Noordwesten von Heerst an de B 71. De opstunns noch plaante Autobahn 20 schall in Tokumst dicht bi Heerst langslopen un kriggt dor an de B 71 ok en Opfohrt.

De nächste Bahnhoff is so bi veer Kilometer wied weg in’n Süüdwesten de Bahnhoff Luunst in Freeschluunbarg an de Bahnlien Bremen–Bremerhoben.

Scholen[ännern | Bornkood ännern]

In de fröhere Dörpschool von Heerst weer längere Tied en Speelkreis ünnerbrocht, de aver in’n Sommer 2010 dichtmaakt hett. Dat Schoolhuus von de fröhere Volkschool is 1853 boot worrn. De School hett 1975 denn dichtmaakt.

Footnoten[ännern | Bornkood ännern]

  1. Onlineprojekt Gefallenendenkmäler
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 100
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 102
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 270
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 150
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 162
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 50
  9. Inwahnertallen op gemeindeverzeichnis.de
  10. a b c Inwahnertallen op verwaltungsgeschichte.de

Weblenken[ännern | Bornkood ännern]

Heerst. Mehr Biller, Videos oder Audiodateien to’t Thema gifft dat bi Wikimedia Commons.