Steenkist von Heerst

De Steenkist von Heerst is en Steenkist ut de Bronztied, de en Stück buten Heerst sowat 600 m na Noordoosten to ut dat Dörp rut op de Geest an’n Rand na dat Grote Moor funnen worrn is.

De Steenkist is ut siede Findlings boot, is twee Meter lang un een Meter breed un hett de Form von en Trapez. Se is na 1935 vördaag kamen, nadem en Buur ut’n 15×6 m groten un twee Meter hogen Langenbarg Sand ruthaalt hett. Dorbi sünd toeerst en poor Urnen vördaag kamen, denn de Steenkist. Utgraven hett dat Ganze von 1938 af an Barnim Lincke, de aver in’n Tweten Weltkrieg fullen is, ehrdat he de Funnen vull utweert harr. Ut de nableven Ünnerlagen hett later denn Karl Hermann Jacob-Friesen en Bericht tohoopstellt. De Funnen sülvs sünd 1946 bi en Brand in dat Museum in Speckenbüttel toschannen gahn.

Resten von Holt ünner’n Kopp von’n Doden düüdt dor op hen, dat de Dode in en Boomsark legen hett. Rechts von’n Doden leeg en Biel ut Bronz un en 79 cm lang Sweert ut Bronz mit en smückt Greep. Links leeg op de Höögd von de Hüften en Pook ut Bronz, bi den de Greep nich mehr dor weer. Op de rechte Sied von’n Liev leeg denn noch en Fibel ut Bronz, bi de de Bögel söven kunzentrische Krinks wiest hett. An de linke Hand hett de Dode en Ring ut Bronz dragen. In de Noordwesteck von dat Graff hebbt se op en Steenplaat en runne Holtschötel funnen, de mit Tiernagels beslahn weer. Son Schötel is ans in Neddersassen noch nich funnen worrn. Schöteln, de to verglieken sünd, kennt’n ans blots ut Skandinavien. De Schötel weer dull uteneendrückt, kunn aver restaureert warrn. An de Ünnersied weer en Steern ut fiene Regen von Nagels (250 Stück) mit twölv Tacken un twee Krinks ut Nagels. De Steenkist un de Funnen schöölt woll ut de öllere Bronztied kamen. De Schötel is vondaag ok in dat Wapen von dat Dörp Heerst afbillt.

Literatur

• Karl-Hermann Jacob-Friesen: Einführung in Niedersachsens Urgeschichte. 2. Teil: Die Bronzezeit. 4. bedeutend erweiterte Auflage. Lax, Hildesheim 1963 (Veröffentlichungen der Urgeschichtlichen Sammlungen des Landesmuseums zu Hannover 15, ISSN 0931-6280)
• Barnim Lincke: Eine bronzezeitliche Wegstrecke in Nordhannover, in: Urgeschichtsstudien beiderseits der Niederelbe I (Festschrift K. H. Jacob-Friesen, 1939, S. 125-145

Weblenken

• Indrag bi Megalithic.uk (engelsch)