Godfrey Smith (Politiker)
Godfrey P. Smith (* 8. Mai 1968 in Belize-Stadt) is en Jurist, Schriever un Politiker ut Belize (PUP).
Leven
[ännern | Bornkood ännern]Smith is 1968 in Belize-Stadt boren.[1] He is verheiraadt mit Valerie Woods un hett twee Kinner.
He hett von 1989 bet 1992 Juristeree an de University of the West Indies in Cave Hill (Barbados) studeert un dor en Bachelor of Laws kregen.[1] 1994 hett he sien Legal Education Certificate an de Norman Manley Law School in Mona (Jamaika) maakt un is in dat sülve Johr as Avkaat tolaten worrn.[1] He weer von 1994 bet 1997 Avkaat in de Kanzlie Barrow & Williams LLP in Belize-Stadt.
Von 2001 bet 2002 hett he an de Fletcher School (Deel von de Tufts University in Medford) International Relations studeert un dat Studium mit en Master of Arts afslaten.
Smith weer von 2017 bet 2019 Richter an’n Eastern Caribbean Supreme Court in Saint Lucia un is siet 2019 Richter an’n Eastern Caribbean Supreme Court in Grenada.
Politik
[ännern | Bornkood ännern]Smith is 1997 bet 1998 Generaalsekretär bi de People’s United Party (PUP) ween un 1998 bet 1999 Staffchef in dat Büro von’n Premierminister. Ünner Premierminister Said Musa hett he in’n Oktober 1999 dat Amt as Generaalstaatsanwalt in dat Kabinett Musa I övernahmen. Dorför is he in’n Senaat beropen worrn.
Bi de Parlamentswahl in Belize 2003 weer he Kannedaat för de PUP in’n Wahlkreis Pickstock un hett de Wahl mit 55,80 % von de Stimmen gegen den unafhängigen Wilfred Peter Elrington un Diane Haylock von de UDP wunnen. Bi de Wahl 2008 weer he in’n sülven Wahlkreis wedder Kannedaat, kunn sik mit 42,31 % von de Stimmen aver nich gegen Wilfred Peter Elrington von de UDP dörsetten.
Dormit weer he von’n 5. März 2003 bet 7. Februar 2008 Afornten von dat Repräsentantenhuus von Belize.
In dat Kabinett Musa II hett he 2003 dat Amt as Butenminister övernahmen, is aver ok Generaalstaatsanwalt bleven.[2] An’n 5. Januar 2004 is he ok noch Minister för Natschonale Sekerheit un Katastrofenmanagement worrn, wat he von Sylvia Flores övernahmen hett.[3] Dat Amt as Generaalstaatsanwalt hett he aver an Eamon Courtenay afgeven.[3]
In’n August 2004 keem dat to ene Regerungskries, as rutkamen is, dat Finanzminister Ralph Fonseca Geller ut’n Soziaalversekerungsfonds bruukt hett, üm Kredite von private Ünnernehmens aftosekern.[4] Smith un söss annere Ministers hebbt Musa opfeddert, Fonseca ut dat Kabinett ruttosmieten.[4] As Musa dat nich daan hett, wullen de söven Ministers (de Grupp is von de Medien in Belize „G7“ döfft worrn) all gemeensaam jemehr Ämter afgeven.[4] Musa kunn den Rüggtridd afwennen, hett aver dat Kabinett ümbillt. Smith is Butenminister bleven, müss sien Amt as Minister för Natschonale Sekerheit aver an Musa afgeven.[5] An’n 29. Dezember 2004 is Smith tosätzlich Minister för Tourismus un Informatschoon worrn, nadem Mark Espat düssen Posten afgeven müss.
An’n 12. April 2006 hett Smith dat Butenministerium an Eamon Courtenay afgeven, is aver Minister för Tourismus, Informatschoon un Katastrofenmanagement bleven. He müss siene Ministerposten afgeven, as de PUP na de Wahl 2008 in de Oppositschoon gahn is.
Schriever
[ännern | Bornkood ännern]Smith hett 2011 en Biografie över George Cadle Price rutbröcht (George Price: A Life Revealed), för de he 2012 den OCM Bocas Prize for Caribbean Literature kregen hett. 2016 hett he en Biografie von Michael Manley rutbröcht (Michael Manley: The Biography).
Warken
[ännern | Bornkood ännern]- Belize: A Caribbean Nation in Central America: Selected Speeches of Said Musa. Ian Randle Publishers, 2005, ISBN 978-9766372163
- George Price: A Life Revealed. Ian Randle Publishers, 2011, ISBN 978-9766375928
- Michael Manley: The Biography. Ian Randle Publishers, 2016, ISBN 978-9766379223
Footnoten
[ännern | Bornkood ännern]- ↑ a b c Martindale-Hubbell International Law Directory. Martindale-Hubbell, 1995
- ↑ New 13 member Cabinet sworn in, Channel 5 Belize an’n 7. März 2003
- ↑ a b Cabinet has new look for 2004, Channel 5 Belize an’n 5. Januar 2004
- ↑ a b c Seven GOB ministers resign!, San Pedro Sun an’n 19. August 2004
- ↑ 7 return, 3 added to new cabinet, Channel 5 Belize an’n 18. August 2004
1981–1984: Said Musa | 1984: Vernon Harrison Courtenay | 1984–1986: Hubert Elrington | 1986–1989: Dean Barrow | 1989–1993: Glenn Godfrey | 1993–1998: Dean Barrow | 1998–1999: Richard Bradley | 1999–2003: Godfrey Smith | 2003–2004: Eamon Courtenay | 2004–2008: Francis Fonseca | 2008–2010: Wilfred Elrington | 2010–2012: Bernard Q. Pitts | 2012–2015: Wilfred Elrington | 2015–2017: Vanessa Retreage | 2017–2020: Michael Peyrefitte | 2020–: Magali Marin-Young
1981–1983: George Cadle Price | 1983–1984: Vernon Harrison Courtenay | 1984–1989: Dean Barrow | 1989–1993: Said Musa | 1993–1998: Dean Barrow | 1998–2002: Said Musa | 2002–2003: Assad Shoman | 2003–2006: Godfrey Smith | 2006–2007: Eamon Courtenay | 2007–2008: Lisa Shoman | 2008–2020: Wilfred Elrington | 2020–: Eamon Courtenay
1984–1986: Derek Aikman | 1986–1989: Eduardo Juan | 1989–1993: Glenn Godfrey | 1993–1998: Henry Young | 1998–2004: Mark Espat | 2004–2008: Godfrey Smith | 2008–: Manuel Heredia