George Cadle Price

Vun Wikipedia
George Cadle Price 1965

George Cadle Price (* 15. Januar 1919 in Belize-Stadt; † 19. September 2011 ok dor) weer en Politiker ut Brietsch-Honduras/Belize (PUP). He weer von 1961 bet 1984 un von 1989 bet 1993 Premierminister von dat Land.

Leven[ännern | Bornkood ännern]

Price is 1919 as Söhn von Irene Cecelia, borene Escalante, un William Cadle Price in Belize-Stadt (to de Tied Hööftstadt von de Kolonie Brietsch-Honduras) boren. He harr acht Süstern un twee Bröder, ünner annern Jane Ellen Usher. Price weer in Belize-Stadt op de Holy Redeemer Primary School un op dat St. John’s College. Price wull kathoolschen Preester warrn un hett dorüm dat Minor Seminary St. Augustine in Mississippi (USA) besöcht un in Guatemala-Stadt dat Mayor Seminario Conciliar. He wull geern in Room Theologie studeren. Dor hett em aver de Twete Weltkrieg von afhollen. Price is dorüm na Belize trügggahn un is Sekretär bi’n Ünnernehmer Robert Sidney Turton worrn. In Belize-Stadt hett he blangenbi för dat Belize Billboard schreven.

He is an’n 19. September 2011 doodbleven. Sien Staatsgräffnis weer an’n 26. September un he liggt op’n Lord’s Ridge Cemetery in Belize-Stadt begraven.

Price weer nich verheiraadt un harr keen Kinner. He hett as Askeet gullen, de en eenfach Leven ahn Luxus föhren dee.

Politik[ännern | Bornkood ännern]

Price hett sik in de Johren 1940 toeerst in de Politik engascheert. He hett sik 1944 dat eerste Maal för de Wahl to’n Stadtraad Belize) von Belize-Stadt opstellen laten un verloren. 1947 is he aver in’n Stadtraad wählt worrn. 1949 hett he sik in dat People's Committee engascheert, dat an’n 29. September 1950 in de People’s United Party (PUP) övergahn is, en Partei, de sik för de Unanfhängigkeit von Belize von Grootbritannien insetten dee. In düsse Tied weer he ok in de General Workers’ Union (GWU) aktiv, de den Gewerkschafts-Arm von de PUP dorstellt hett. Bi de GWU weer Price Viez-Präsident.

1956 hett Price dat Amt as Parteibaas von de PUP von Leigh Richardson övernahmen. Dat hett dorto föhrt, dat en ganze Reeg Lüüd von’n Richardson/Goldson-Flögel ut de PUP rut sünd un de ne’e Honduran Independence Party (HIP) grünnt hebbt. Ut de HIP is 1958 de National Independence Party (NIP) worrn un 1973 de United Democratic Party (UDP), wat vondaag de twete wichtige Partei in dat Twee-Partein-System von Belize is. Price is bet 1996 Parteibaas von de PUP bleven.

Von 1956 bet 1962 weer Price Börgermeester von Belize-Stadt.

Bi de Parlamentswahl in Brietsch-Honduras 1954 weer he Kannedaat för de PUP in’n Wahlkreis Belize Noord un hett de Wahl mit 75,0 % von de Stimmen gegen den unafhängigen John Smith wunnen. Ok bi de Wahl 1957 weer he in’n sülven Wahlkreis Kannedaat un hett sik mit 70,2 % von de Stimmen gegen Jaime Staines von de NP dörsett.

As för de Wahl 1961 de Wahlkreise nee indeelt worrn sünd, is Price in’n Wahlkreis Freetown antreden un hett dor mit 67,1 % von de Stimmen gegen Sabino Savery von de NIP un Erenst Cain von de CDP wunnen. Ok bi de Wahlen 1965 (60,1 % gegen Tharine Rudon, NIP), 1969 (56,9 % gegen Henry Fairweather, NIP), 1974 (60,2 % gegen Henry Fairweather, UDP) un 1979 (51,5 % gegen Manuel Esquivel, UDP) hett he sik in’n Wahlkreis Freetown wedder dörsett. Bi de Wahl 1984 aver hett Price mit blots noch 38,7 % von de Stimmen gegen Derek Aikman von de UDP verloren.

Bi de Wahl 1989 is Price in’n Wahlkreis Pickstock antreden un hett dor 59,8 % von de Stimmen haalt. Dormit kunn he sik gegen Cyril Davis von de UDP dörsetten. Ok bi de Wahlen 1993 (52,9 % gegen Wilfred Peter Elrington, UDP) un 1998 (53,17 % gegen Elrington) hett he sik in’n Wahlkreis Pickstock wedder dörsett.

Dormit weer he von 1954 bet 1963 Afornten von de Legislativversammlung, de an’n 1. Januar 1964 in dat Repräsentantenhuus övergahn is. Price weer denn von 1964 bet 1984 un von 1989 bet 2003 Afornten von dat Repräsentantenhuus.

Price is an’n 7. April 1961 Eersten Minister von Brietsch-Honduras worrn. Ünner de ne’e Verfaten hett sik sien Titel an’n 1. Januar 1964 op Premier ännert. Dat weer he denn bet to’n 12. September 1981. An düssen Dag hett George Price de brietsche Kolonie in de Unafhängigkeit föhrt un hett denn den Titel Premierminister dragen. Tosätzlich is he bet 1984 ok Butenminister von Belize worrn. Price is bet to’n 17. Dezember 1984 Premierminister bleven (Kabinett Price I).

An’n 6. Januar 1984 hett Price von C. L. B. Rogers dat Ministerium för Natschonale Sekerheit övernahmen, dat he bet Dezember 1984 behollen hett. Ok dat Ministerium för Finanzen harr he von 1981 bet 1984.

1984 bet 1989 müss de PUP in de Oppositschoon un de UDP hett ünner Premierminister Manuel Esquivel de Macht övernahmen.

Bi de Wahl 1989 kunnen Price un de PUP wedder de Mehrheit in dat Repräsentantenhuus winnen un Price weer von’n 7. September 1989 bet 3. Juli 1993 wedder Premierminister (Kabinett Price II). In düsse Tied von 1989 bet 1993 weer Price tosätzlich ok Minister för Natschonale Sekerheit un Finanzen un Binnenminister.

Nadem de PUP von 1993 bet 1998 wedder in de Oppositschoon müss, weer Price von Juli 1993 bet Oktober 1996 Oppositschoonsföhrer in dat Repräsentantenhuus. In’n Oktober 1996 hett he düt Amt an Said Musa afgeven.

Bi de Wahl 1998 hett sik de PUP wedder dörsett un mit Said Musa den Premierminister stellt. Ünner Musa weer Price as Senior Minister Maat von dat Kabinett Musa I. An’n 15. Oktober 2001 hett Price von Jorge Espat dat Ministerium för Natschonale Sekerheit un Katastrofenmanagement övernahmen, wat he bet to’n 7. März 2003 föhrt hett.

Ehren[ännern | Bornkood ännern]

In Belize warrt Price as Vader von de Natschoon ansehn.

1982 is Price Maat von dat brietsche Privy Council worrn.

In’n September 2000 is Price de eerste Person ween, de mit’n Order of National Hero uttekent worrn is. 2001 hett he den Order of the Caribbean Community kregen.

Siet 21. September 2012 is de George Price Highway na em nöömt.

Literatur[ännern | Bornkood ännern]

Weblenken[ännern | Bornkood ännern]

George Cadle Price. Mehr Biller, Videos oder Audiodateien to’t Thema gifft dat bi Wikimedia Commons.