National Party (Belize)

Vun Wikipedia

De National Party (NP) weer en polietsche Partei in Brietsch-Honduras (vondaag Belize), de von 1951 bet 1958 bestahn hett. Se weer pro-kolonial utricht.

Historie[ännern | Bornkood ännern]

De Partei hett sik an’n 21. August 1951 billt. Dat Grünnen von de Partei weer en Reakschoon op de People’s United Party (PUP), de sik an’n 29. September 1950 billt harr. De PUP weer för de Unafhängigkeit von de brietsche Kolonie von Brietsch-Honduras. In de National Party hebbt sik dorüm Lüüd sammelt, de den Status quo as Kolonie bewohren wullen.

As eersten Parteibaas un Präsident is Woldrich Harrison Courtenay wählt worrn. Siez Viez weer Herbert Fuller. As Sekretär is E. O. B. Barrow wählt worrn un as Vörsitter Lionel Francis.

De eerste Wahl, in de de Partei aktiv weer, weer de Wahl to’n Stadtraad von Belize-Stadt 1952. In düsse Wahl is Herbert Fuller as Präsident von’n Stadtraad wählt worrn. Ok Floss Casasola is in’n Stadtraad intagen.

Bi de Parlamentswahl in Brietsch-Honduras 1954 hett de NP in de negen Wahlkreise söven Kannedaten för de Legislativversammlung opstellt, von de blots een, Charles Westby in’n Wahlkreis Toledo, ok wählt worrn is.

Bi de Wahl to’n Stadtraad von Belize-Stadt 1956 sünd Herbert Fuller un Floss Casasola wedderwählt worrn.

Bi de Parlamentswahl in Brietsch-Honduras 1957 dorgegen kunn de NP von de söven opstellten Kannedaten nich een in de Legislativversammlung bringen. Bi düsse Wahl is ok de Honduran Independence Party (HIP), de 1956 von fröhere PUP-Maten grünnt worrn is, dat eerste Maal antreden.

Üm de Oppositschoonskräft to vereenen, hett sik de NP op en Parteiversammlung an’n 26. Juni 1958 sülvs oplööst. De Maten von de NP hebbt sik mit de HIP to’n 1. Juli 1958 in de National Independence Party (NIP) tohoosplaten. 1973 is de NIP in de United Democratic Party (UDP) opgahn, de vondaag noch de twete grote Partei blangen de PUP in dat Twee-Partein-System von Belize is.