Woldrich Harrison Courtenay

Vun Wikipedia
Zur Navigation springen Zur Suche springen

Woldrich Harrison Courtenay[Notiz 1] (* 15. Juli 1904; † 1982[1]) weer en Jurist un Politiker ut Brietsch-Honduras (NP, PUP).

Leven[ännern | Bornkood ännern]

Courtenay is 1904 boren.[2] He hett toeerst as Beamten in Brietsch-Honduras arbeidt (1920 bet 1937), bevör he an de London University Juristeree studeert hett.[2] He is na dat Studium (Afsluss as Doctor of Laws) 1936 Maat von Lincoln’s Inn un dormit as Avkaat tolaten worrn.[2] He hett 1937 in Belize-Stadt de Kanzlie W. H. Courtenay & Co. grünnt.[2]

Courtenay weer ok en wichtigen Funkschonär in de anglikaansche Kark von Brietsch-Honduras.

Courtenay weer verheiraadt mit Josephine, borene Robinson. De beiden harrn veer Kinner.[2] Een von sien Söhns weer Vernon Harrison Courtenay (1932–15. August 2009), de ok Politiker weer.

Politik[ännern | Bornkood ännern]

Courtenay weer von 1948 bet 1954 Afornten von’n Legislativraad von Belize un von 1947 bet 1955 Maat von’n Exekutivraad.[2] In siene Tied in Legislativraad un Exekutivraad weer he in de National Party (NP), von de he 1951 Mitgrünner weer. Courtenay weer von 1951 bet 1958 ok Parteibaas von de NP. He weer en Gegner von de People’s United Party, wat so wied güng, dat sien Huus von PUP-Anhängers mit Steen angrepen worrn is.[3]

1958 stünn aver de Anföhrer von de PUP, George Cadle Price, as Opröhrer vör Gericht un Courtenay weer sien Avkaat.[3] 1959 hett sik Cortenay dorför insett, dat sik PUP un NIP (Nafolger von de 1958 oplööste NP) annegert, üm op en wichtige Kunferenz in London, bi de dat üm mehr Rechten för Brietsch-Honduras güng, mit een Stimm to snacken.[3] Siet düsse Tied weer Courtenay PUP-Maat.[3]

Von 1961 bet 1965 weer he Spreker von de Legislativversammlung un von’n 12. März 1965 bet 3. Oktober 1974 ünner Premier George Cadle Price Spreker von dat Repräsentantenhuus (in ene Tied, as dat Repräsentantenhuus kumplett von de PUP domineert weer).

Ehren[ännern | Bornkood ännern]

To Neejohr 1950 is he Officer of the Order of the British Empire worrn un to Neejohr 1973 Knight Commander of the Order of the British Empire. He weer Kroonanwalt (Queen’s Counsel).

Notizen[ännern | Bornkood ännern]

  1. faken ok Woolrich Harrison Courtenay schreven oder afkört as W. H. Courtenay

Footnoten[ännern | Bornkood ännern]

  1. Who was who: 1897-2000. St. Martin's Press, 2002, Sied 184
  2. a b c d e f Lloyd Sydney Smith: Caribbean Who, What, why. 1969, Sied 340
  3. a b c d Evan X Hyde: From The Publisher, Amandala an’n 29. November 2011