Floss Casasola

Floss Effie Casasola (borene Kemp; * 1903 in Belize-Stadt; † 1991 ok dor) is en Schoolmeestersche un Politikerin ut Brietsch-Honduras/Belize (NP, NIP).

Leven

Floss Effie Kemp is 1903 as Dochter von Diana un Joseph Kemp un jüngst von söven Kinner in Belize-Stadt boren. Ehr Vader is al doodbleven, as se man een Johr oold weer. Kemp güng op de Wesley School in Belize-Stadt un is Schoolmeestersche worrn. Toeerst an de Wesley School, för en korte Tied an de Ebenezer School un denn wedder an de Wesley School. Se hett ok de Örgel in de Wesley Church speelt. As Schoolmeestersche hett se besünners Weert op den Musikünnerricht leggt.

1933 hett se Edward Frederick Casasola freet. De beiden harrn sülvs keen Kinner, man Casasola hett de Kinner von ehren Mann ut en fröhere Beziehung un twee Adoptivkinner groottagen.

1949 is Casasola Präsidentin von’n Schoolmeesterbund von Brietsch-Honduras worrn un 1954 Rektersche von de Wesley Primary School.

As Schoolmeestersche hett Casasola ok Ünnerricht för vullwussen Lüüd geven, ünner annern in dat Fängnis von Belize-Stadt. Dor hett se Philip Goldson drapen, de to de Tied as „Opröhrer“ in Haft weer un hett anfungen sik för de Unafhängigkeitsbewegung in Brietsch-Honduras to intresseren.

Se weer 1951 Mitgrünnerin von de National Party (NP).

Bi de Wahl to’n Stadtraad von Belize-Stadt 1952 is se in’n Stadtraad intagen un 1956 wedderwählt worrn.

1958 is de National Party mit de Honduran Independence Party (HIP) to de National Independence Party (NIP) tohoopgahn.

Bi de Parlamentswahl in Brietsch-Honduras 1961 weer se Kannedatin för de NIP in’n Wahlkreis Albert un hett 18,7 % von de Stimmen haalt. Dormit keem se op’n drüdden Platz achter Frederick Westby von de PUP un Nicholas Pollard von de CDP.

Ehren

To Neejohr 1961 is Casasola Member of the Order of the British Empire worrn. Se weer ok Justice of the Peace.

Se hett na ehren Dood 1997 en Outstanding Artists’ Award kregen un is 2010 dör Premierminister Dean Barrow mit en Order of Distinction uttekent worrn.