Lisa Shoman

Vun Wikipedia
Zur Navigation springen Zur Suche springen

Lisa Marie Shoman (* 1964) is en Diplomatin un Politikerin (PUP) ut Belize.

Shoman is 1964 as Dochter von Hilda, borene Hoy, un Yasin Shoman boren. Assad Shoman is ehr Unkel. Se hett von 1982 bet 1986 Juristeree an de University of the West Indies in Mona (Jamaika) studeert un düt Studium mit en Bachelor of Laws afslaten. Von 1986 bet 1988 hett se denn an de Norman Manley Law School (ok in Mona) ehr Certificate of Legal Education maakt. In’n Oktober 1988 is se as Avkatin tolaten worrn. Se is denn Kroonavkatin in dat Büro von’n Direkter för apentliche Anklagen worrn. Een Johr later is se in en private Kanzlie wesselt un hett as Avkatin arbeidt. Von 1997 bet 2008 weer se Partnerin von de Kanzlie Shoman & Chebat (mit Michel Chebat). Siet 2008 hett se ehr egen Kanzlie ahn Partners. Se is 1996 Vörsitterin von’n Avkatenvereen von Belize (Belize Bar Association) worrn.

Von 1998 bet 2000 weer se Vörstandsvörsitterin von Belize Telecommunications Limited.

An’n 24. August 2000 is se Baadschopperin von Belize in Washington D.C., USA, worrn un weer ok as Stännige Vertrederin Belize bi de Organisatschoon von Amerikaansche Staten akkrediteert un as Hoochkommissarin von Belize för Kanada insett. Von düssen Posten is se an’n 5. Juni 2007 afberopen worrn, üm ünner Premierminister Said Musa Butenministerin un Ministerin för Butenhannel in dat Kabinett Musa II to warrn, nadem Eamon Courtenay düt Amt afgeven harr.[1] Se is bet to’n 12. Februar 2008 Butenministerin bleven, as Musa un de PUP de Kabinettswahl 2008 verloren hebbt un de UDP ünner Dean Barrow an de Macht keem. Shoman hett denn wedder as Avkatin arbeidt.

Dormit se Butenministerin warrn kunn, hett Said Musa ehr 2007 in’n Senaat beropen, wat se bet to de Wahl 2008 bleven is. 2009 is se as Vertrederin von de Oppositschoon noch en tweet Maal in’n Senaat beropen worrn.

In’n Dezember 2009 is Shoman von’n Präsident von dat Böverste Gericht, Abdulai Conteh, as Senior Counsel beropen worrn.

Shoman hett in’n September 2009 den jamaikaanschen Schriever Joseph Andrew „Joey“ Clarke († 17. Januar 2011) freet.

Footnoten[ännern | Bornkood ännern]

  1. Deputy Prime Minister John Briceno Resigns, Eamon Courtenay Joins Him, 7 News Belize an’n 4. Juni 2007