Said Musa

Said Wilbert Musa (* 19. März 1944 in San Ignacio) is en Politiker ut Belize (PUP). He weer von 1998 bet 2008 Premierminister von Belize.

Tohoop mit Vernon Harrison Courtenay, Assad Shoman un C. L. B. Rogers warrt he as een von de Vaders von de Verfaten von Belize ansehn, de 1981 beslaten worrn is.^[1]

Leven[ännern | Bornkood ännern]

Musa is 1944 as veert von acht Kinner von Aurora, borene Gibbs, un Hamid Musa in San Ignacio (to de Tied Deel von de Kolonie Brietsch-Honduras) boren. Sien Vader weer Palästinenser. He güng von 1949 bet 1957 op de Saint Andrew’s Primary School in San Ignacio, denn von 1957 bet 1960 op dat St. Michael’s College un 1960 bet 1961 op dat St. John’s College in Belize-Stadt. Musa hett Juristeree an de Universität Manchester studeert un dat Studium 1966 mit en Bachelor of Laws afslaten. Dormit is he as Avkaat tolaten un Maat von Gray’s Inn worrn. 1967 is he na Belize trügg un weer dor toeerst Crown Counsel, hett denn aver in de private Kanzlie Musa & Balderamos as Avkaat arbeidt.

Musa is verheiraadt mit siene Fro Joan Musa. De beiden hebbt ünner annern den Söhn Kareem Musa, de ok Politiker is. Henry Charles Usher is ok en Söhn to Musa.

Politik[ännern | Bornkood ännern]

In de Johren 1960 hett Musa tohoop mit Assad Shoman dat Ad Hoc Committee for the Truth About Vietnam grünnt, dat sik gegen den Vietnamkrieg richten dee.

1970 is Musa Maat von de People’s United Party (PUP) ünner George Cadle Price worrn.

Bi de Parlamentswahl in Belize 1974 weer he Kannedaat för de PUP in’n Wahlkreis Fort George un hett de Wahl mit 46,6 % von de Stimmen gegen Dean Lindo von de UDP verloren. He is denn aver von 1974 bet 1979 in’n Senaat beropen worrn.

Bi de Wahl 1979 kunn he sik mit 52,1 % von de Stimmen gegen Lindo dörsetten. Bi de Wahl 1984 hett Musa 47,6 % haalt un Lindo kunn sik wedder dörsetten. Bi de Wahlen 1989 (62,1 % gegen Lindo), 1993 (68,3 % gegen Michael Godoy, UDP), 1998 (74,59 % gegen Derek Aikman, UDP), 2003 (75,87 % gegen Carlos Walker, UDP, un den unafhängigen Francis Gegg), 2008 (57,64 % gegen George Gough, UDP), 2012 (61,93 % gegen Gough) un 2015 (69,06 % gegen Roger Espejo, UDP, un Rollin Powery, BPP) kunn Musa den Wahlkreis Fort George jümmer wedder winnen. Bi de Wahl 2020 wull Musa wedder antreden un weer na de PUP-Vörwahl ok as Kannedaat för’n Wahlkreis Fort George nomineert. Man na en lichten Slaganfall in’n Mai 2020 hett Musa in’n September 2020 sien Kannedatur trüggtagen.^[2] Sien Nafolger weer denn sien Söhn Henry Charles Usher.

Dormit weer he von’n 21. November 1979 bet 14. Dezember 1984 un von’n 4. November 1989 bet November 2020 Afornten von dat Repräsentantenhuus von Belize.

Von 1979 bet 1984 weer Musa Generaalstaatsanwalt un Minister för Weertschopliche Entwicklung, Bildung, Sport un Kultur (Kabinett Price I). Tosätzlich hett he in de Kommission seten, de de Verfaten von Belize utklamüsert hett, de 1981 mit de Unafhängigkeit von dat Land in Kraft treden is.

Dat Amt as Generaalstaatsanwalt hett he an’n 17. Januar 1984 an Vernon Harrison Courtenay afgeven.

Von 1989 bet 1993 weer Musa ünner Premierminister George Cadle Price Butenminister un Minister för Bildung un Weertschopliche Entwicklung in dat Kabinett Price II.

Nadem George Cadle Price dat Leid över de PUP afgeven hett, hett Musa 1996 dat Amt as Parteibaas von de PUP övernahmen un is dormit ok Oppositschoonsföhrer in dat Repräsentantenhuus worrn.

De Wahl 1998 hett de PUP wunnen un Musa is an’n 28. August 1998 Premierminister worrn. Tosätzlich hett he as Premierminister von’n 31. August 1998 af an ok dat Amt as Finanzminister in dat Kabinett Musa I övernahmen.

In dat Kabinett Musa II hett he dat Amt as Finanzminister an Francis Fonseca afgeven. Blangen dat Amt as Premierminister weer he in düsse Tied Minister för Bildung (mit Tostännigkeit för Junge Lüüd un Sport) un för Apentlichen Deenst.^[3]

An’n 5. Januar 2004 hett he dat Ministerium för Bildung (mit Junge Lüüd un Sport) an Francis Fonseca afgeven un is dorför Minister för Natschonale Entwicklung worrn.^[4]

In’n August 2004 keem dat to ene Regerungskries, as rutkamen is, dat Finanzminister Ralph Fonseca Geller ut’n Soziaalversekerungsfonds bruukt hett, üm Kredite von private Ünnernehmens aftosekern.^[5] Söven Ministers hebbt Musa opfeddert, Fonseca ut dat Kabinett ruttosmieten.^[5] As Musa dat nich daan hett, wullen de söven Ministers (de Grupp is von de Medien in Belize „G7“ döfft worrn) all gemeensaam jemehr Ämter afgeven.^[5] Musa kunn den Rüggtridd afwennen, hett aver dat Kabinett ümbillt. He hett dat Ministerium för Natschonale Sekerheit von Godfrey Smith övernahmen.^[6] An’n 29. Dezember 2004 hett Musa de Tostännigkeit för’n Apentlichen Deenst an Jose Coye afgeven.

An’n 14. Juli 2005 is dat Kabinett wedder ümbillt worrn. Musa hett dat Ministerium för Natschonale Sekerheit an Juan Vildo Marin afgeven un dorför von Jose Coye den Apentlichen Deenst övernahmen un von Assad Shoman Natschonale Entwicklung.^[7] Natschonal Entwicklung hett he aver al an’n 3. November 2005 wedder an Mark Espat afgeven.^[8]

Nadem Mark Espat in’n Mai 2007 ut dat Kabinett utscheden is, hett Musa von en dat Ministerium för Natschonal Entwicklung övernahmen.^[9]

Bi de Parlamentswahl 2008 weer Musa wedder Kannedaat von de PUP för dat Amt as Premierminister. De Partei hett aver düüdlich verloren un Musa müss an’n 8. Februar 2008 dat Amt as Premierminister an Dean Barrow von de UDP övergeven. Nadem he un de PUP afwählt worrn sünd, weer Musa von’n 8. Februar 2008 bet 30. März 2008 noch wedder Oppositschoonsföhrer, is denn aver von Johnny Briceño as Parteibaas un Oppositschoonsföhrer aflööst worrn. Bet November 2020 seet Musa as eenfachen Afornten in de Oppositschoon.