Dean Lindo
Dean Russell Lindo (* 4. September 1932 in Belize-Stadt; † 17. September 2018 ok dor) weer en Avkaat un Politiker (UDP) ut Belize.
Leven
[ännern | Bornkood ännern]Lindo is 1932 in Belize-Stadt boren. He hett toeerst Weertschopswetenschoppen an de New York University (USA) studeert un dor 1955 en Bachelor of Science un 1958 en Master of Arts in Economics maakt.[1] He is denn an de Durham University (Grootbritannien) wesselt, üm Juristeree to studeren, un hett dor 1962 en Bachelor of Laws maakt.[1] 1963 is he Utter Barrister un as Avkaat tolaten worrn.[1] He weer Maat von Lincoln’s Inn. Lindo hett 1964 anfungen, in Brietsch-Honduras as Avkaat to arbeiden.[1] He harr sien Büro in de 7 Church Street in Belize-Stadt. En Tied lang weer sien Süstersöhn Dean Barrow Partner in sien Büro.[2] Blangenbi hett he von 1964 bet 1966 ok as Dozent an de University of the West Indies (Campus in Belize-Stadt) arbeidt (in dat Extramural Department, dat heet Kurse för nich-inschreven Studenten).[1]
Lindo weer verheiraadt mit Eva Elizabeth „Betty“ Fairweather.
Lindo is an’n 17. September 2018 in sien Huus in de Naverschop Buttonwood Bay von Belize-Stadt doodbleven.[3] De Truurfier weer an’n 24. September in de St. John’s Cathedral.[3]
Politik
[ännern | Bornkood ännern]Lindo weer toeerst Maat von de National Independence Party (NIP). 1969 wull he den Parteivörsitt von Philip Goldson övernehmen, kunn sik aver nich dörsetten.[3] He hett denn de Partei verlaten üm sien Politik in en egen Partei, dat People’s Development Movement (PDM) ümtosetten.[3] He weer Parteibaas von dat PDM, aver de Partei kunn gegen de Övermacht von de People’s United Party (PUP) nix utrichten. Dat PDM hett sik dorüm 1973 mit de Liberal Party un de NIP tohoopslaten un de United Democratic Party (UDF) billt.[3] Lindo weer von 1974 bet 1979 Vörsitter von de UDF, bevör he den Vörsitt an Theodore Aranda afgeven müss.
Bi de Parlamentswahl 1969 weer he för de NIP Kannedaat in’n Wahlkreis Fort George un hett mit 47,9 % von de Stimmen gegen Alexander Hunter von de PUP verloren. Bi de Wahl 1974 weer he in’n sülven Wahlkreis wedder Kannedaat, nu aver för de ne’e UDP. He hett dütmaal mit 51,8 % von de Stimmen gegen Said Musa von de PUP wunnen. Bi de Wahl 1979 hett he in’n Wahlkreis Fort George 47,0 % von de Stimmen kregen un gegen Said Musa verloren. Bi de Wahl 1984 harr he mit 51,3 % wedder de Bavenhand un hett sik gegen Musa dörsett. Bi de Wahl 1989 kunn Lindo blots 36,9 % halen un hett düüdlich gegen Musa verloren. Dormit weer Lindo von’n 30. Oktober 1974 bet 21. November 1979 un wedder von’n 14. Dezember 1984 bet 4. September 1989 Maat von dat Repräsentantenhuus.
Lindo weer ünner Premierminister Manuel Esquivel von 1984 bet 4. Juni 1986 Minister för Natürliche Ressourcen un von 1984 bet 1989 Minister för Bueree un Forsten von Belize (Kabinett Esquivel I).[1]
An’n 20. September 1993 is he Baadschopper von Belize in Washington DC worrn, wat aver an’n 1. Oktober 1993 al wedder en Enn harr.
He hett sik denn ut de Politik wedder trüggtagen un as Avkaat in Belize-Stadt arbeidt.[3]
Footnoten
[ännern | Bornkood ännern]- ↑ a b c d e f The International Year Book and Statesmen’s Who’s who. Band 42, Burke’s Peerage Limited, 1994, Sied 365
- ↑ B. Turner: The Statesman’s Yearbook 2012: The Politics, Cultures and Economies of the World. Springer, 2017, Sied 201
- ↑ a b c d e f Rowland A. Parks: Dean Russell Lindo, S.C., first UDP leader, dead at 86, Amandala an’n 19. September 2018
–1981: Florencio Marin Sr. | 1984–1989: Dean Lindo | 1989–1993: Michael Espat | 1993–1998: Russell Garcia | 1998–2003: Daniel Silva | 2003–2004: Servulo Baeza | 2004–2006: Michael Espat | 2006–2008: Juan Vildo Marin | 2008–2012: Rene Jaime Montero | 2012–2016: Gaspar Vega | 2016–: Godwin Hulse