Florencio Marin Sr.

Florencio Julian Marin Sr. (* 1936 oder 1937 in San Narciso) is en Politiker ut Belize (PUP).

Marin is 1936 oder 1937 in San Narciso boren un weer Schoolmeester.^[1] Kinner von Marin sünd Florencio Marin Jr. un Magali Marin-Young.

1960 is Marin in de Politik gahn, as Belize noch Brietsch-Honduras weer.^[1] He is 1963 Vörsitter von de Northern Cane Workers Union worrn, nadem George Cadle Price un Mateo Ayuso sik dorför insett harrn, dat Jesus Ken düt Amt afgeven müss.

Bi de Parlamentswahl 1965 weer he för de PUP Kannedaat in’n Wahlkreis Corozal Süüd un hett mit 83,4 % von de Stimmen gegen Isidoro Castaneda von de NIP wunnen. Bi de Wahl 1969 weer he in’n sülven Wahlkreis wedder Kannedaat un hett dütmaal mit 79,3 % von de Stimmen gegen Lucilo Teck (NIP) wunnen. Ok bi de Wahlen 1974 (54,4 % gegen Santiago Gongora von de CUF un den unafhängigen Edwardo Ayuso) un 1979 (60,6 % gegen Howard A. Reyes von de UDP) hett he sien Wahlkreis verdeffendeert.

To de Wahl 1984 sünd de Wahlkreise nee tosneden worrn un Marin is nu in’n Wahlkreis Corozal Süüdoost antreden. He hett sik mit 54,1 % gegen Concepcion Campos (UDP) dörsett. Ok bi de Wahlen 1989 (52,9 % gegen Doroteo Pott, UDP), 1993 (60,1 % gegen Lucio Eloy Navarro, UDP), 1998 (66,50 % gegen Lucio Eloy Navarro, UDP) un 2003 (51,38 % gegen Servando Samos, UDP) kunn he sik jümmer wedder dörsetten. He is dormit von’n 1. März 1965 bet 7. Februar 2008 Afornten in dat Repräsentantenhuus ween. To de Parlamentswahl 2008 is he nich wedder antreden un sien Söhn Florencio Marin Jr. is in’n Wahlkreis Corozal Süüdoost antreden un hett de Wahl ok wunnen.

Ünner Premier George Price weer Marin an’t Enn von de Johren 1970 bet 1981 Minister för Bueree von Belize. Nadem Belize 1981 unafhängig worrn is, is Marin Minister för Natürliche Ressourcen worrn, wat he bet 1984 bleven is, as de UDP bi de Parlamentswahl de Macht övernahmen hett. Marin weer in düsse Tied von’n 17. Dezember 1984 bet 7. September 1989 Oppositschoonsföhrer von Belize (Premierminister weer Manuel Esquivel).

Bi de Wahl 1989 is he ünner Premierminister George Price Viez-Premier un Minister för Natürliche Ressourcen worrn. Mit de Wahl 1993, bi de de UDP de Macht övernahmen hett, hett he sien Ministerposten wedder verloren. He weer in düsse Tied, von 1989 bet 1993, ok Viez-Premierminister.

As George Price 1996 den Parteivörsitt von de PUP afgeven dee, weer Marin Kannedaat as sien Nafolger, is bi de Wahl aver von Said Musa slahn worrn.

Nadem de PUP de Wahl 1998 wunnen hett, is Marin ünner Premierminister Said Musa Minister för de Zuckerindustrie, lokale Verwaltung un latienamerikaansche Saken worrn. An’n 30. November 1999 hett he sien Amt wedder dalleggt un is Vörsitter von de Corozal Free Zone worrn.^[2] Sien Nafolger as Minister weer Valdemar Castillo.

An’n 5. Juni 2007 hett he dat Amt as Minister för Natürliche Ressourcen un Ümwelt övernahmen un dorüm sien Amt as Vörsitter von de Corozal Free Zone wedder afgeven.^[3] Mit de Wahl 2008 un de Machtövernahm dör de UDP hett he sien Ministeramt in’n Februar 2008 wedder verloren.