Russell Garcia (Politiker)

Vun Wikipedia
Zur Navigation springen Zur Suche springen

Russell Alexander „Chiste“ Garcia (* 16. Dezember 1950 in Stann Creek Town; † 19. Dezember 2009 in Belize-Stadt) weer en Politiker ut Belize (UDP).

Leven[ännern | Bornkood ännern]

Garcia is 1950 as Söhn von Gwendolyn, borene Trapp, un Alejandro Garcia in ene Garifuna-Familie in Stann Creek Town (vondaag Dangriga) boren.[1][2] Myrtle Palacio weer siene Halvsüster.[3] Garcia hett dat Lynam Agricultural College besöcht un hett denn in de Johren 1970 an de Central Farm Training School in Central Farm arbeidt.[4] Sien Ökelnaam Chiste keem von’n Filmheld Maciste un hett op sien Sportlichkeit un Knööv anspeelt.[4] He weer verheiraadt mit Florence Garcia, borene Sabal, un hett in Dangriga leevt.[1][3] De beiden harrn teihn Kinner.[1]

Garcia is an’n 19. Dezember 2009 in dat Karl Heusner Memorial Hospital in Belize-Stadt doodbleven, nadem he al een Johr mit Nerenverseggen to kriegen harr.[1][3] De Truurfier weer an’n 23. Dezember in de Sacred Heart Church in Dangriga.[1]

Politik[ännern | Bornkood ännern]

Bi de Parlamentswahl 1993 weer he för de UDP Kannedaat in’n Wahlkreis Dangriga un hett mit 56,4 % von de Stimmen gegen Theodore Aranda von de PUP wunnen. Bi de Wahl 1998 weer he in’n sülven Wahlkreis wedder Kannedaat un hett dütmaal mit 41,63 % von de Stimmen gegen Aranda verloren. Bi de Wahl 2003 is he ok wedder antreden un hett mit 44,58 % von de Stimmen gegen Sylvia Flores (PUP) verloren.

Dormit weer Garcia von 1993 bet 1998 Afornten von dat Repräsentantenhuus von Belize. In de sülve Tied weer he ok ünner Premierminister Manuel Esquivel Minister för Bueree.

Von 2006 bet März 2009 weer he Maat von’n Stadtraad von Dangriga.[3]

Ehren[ännern | Bornkood ännern]

De Multifunkschoons-Sport- un Veranstaltungs-Hall in Dangriga, de 2018 trech worrn is, is em to Ehren Russell ‘Chiste’ Garcia Auditorium nöömt worrn.

Footnoten[ännern | Bornkood ännern]

  1. a b c d e Heft to de Truurfier
  2. Chiste passes, The Guardian an’n 22. Dezember 2009
  3. a b c d Adele Ramos: Russell “Chiste” Garcia, former UDP politician of Dangriga, loses battle with renal failure, Amandala an’n 23. Dezember 2009
  4. a b Romel Cuello: Romel “bigging” up Chiste, Amandala an’n 3. Februar 2018