Gaspar Vega (Politiker)
Margarito Gaspar „Gapi“ Vega (* 22. Februar 1957 in San Estevan) is en Politiker ut Belize (UDP).
Leven[ännern | Bornkood ännern]
Vega is 1957 in San Estevan boren.[1] He güng op dat Muffles College in Orange Walk un hett in de Versekerungs-Branche arbeidt. 1988 hett he en egen Firma grünnt, dat Hannelsünnernehmen Vega’s Imports Ltd.
Politik[ännern | Bornkood ännern]
Bi de Parlamentswahl in Belize 2008 weer he Kannedaat för de UDP in’n Wahlkreis Orange Walk Noord un hett de Wahl mit 56,93 % von de Stimmen gegen Servulo Baeza von de PUP wunnen. Bi de Wahl 2012 (58,49 % von de Stimmen gegen Jorge Alberto Briceño, PUP) un bi de Wahl 2015 (53,08 % gegen Ramon Cervantes, PUP) hett he sik in’n sülven Wahlkreis ok wedder dörsett.
Dormit is he siet 2008 Afornten von dat Repräsentantenhuus von Belize. He is ünner Premierminister Dean Barrow an’n 13. Februar 2008 Minister för Natürliche Ressourcen un Ümwelt un tosätzlich Viez-Premierminister worrn (Kabinett Barrow I). In dat Kabinett Barrow II hett he an’n 13. März 2012 de Ministerposten för Natürliche Ressourcen un Ümwelt afgeven un is Minister för Bueree worrn. Viez-Premierminister is he aver bleven. In dat Kabinett Barrow III is he denn an’n 9. November 2015 wedder för dat Ministerium för Ümwelt tostännig worrn un hett Bueree afgeven.
2016 is Vega vörhollen worrn, dat he as Minister för Natürliche Ressourcen in dubiose Landgeschäften verwickelt weer, bi de Vega sien Söhn Andre den Vördeel harr.[2] Dat Ministerium hett en Stück Land in de Neegd von de Haulover Bridge an en Middelsmann verköfft, de dat för 15.000 Belize-Dollar an Vega sien Söhn wiederverköfft hett, wat en Pries düüdlich ünner’n Marktpries weer.[2] Dat Land weer aver in Privaatbesitt un dorüm is de Verkoop trüggnahmen worrn. Dat Ministerium hett Andre Vega en Utgliek von 400.000 Belize-Dollar betahlt, wat de Marktpries weer.[2] Dat is as Korrupschoon utleggt worrn un 2019 is Andre Vega von en Gericht veroordeelt worrn, dat Geld trüggtogeven.[2]
An’n 17. Oktober 2016 müss Gaspar Vega dorüm siene Ämter as Viez-Premierminister un as Minister för Ümwelt afgeven. Dat Ministerium för Bueree güng an Godwin Hulse un de Viez-Premierminister an Patrick Faber.
Vega is Afornten bleven, hett aver nich mehr an Sitzungen von dat Repräsentantenhuus deelnahmen.[2]
Footnoten[ännern | Bornkood ännern]
- ↑ Belize Public Service Staff List 2014
- ↑ a b c d e Rowland A. Parks: Vega ordered to pay back $400,000, Amandala an’n 24. Juli 2019
1981–1984: C. L. B. Rogers | 1984–1989: Curl Thompson | 1989–1993: Florencio Marin Sr. | 1993–1998: Dean Barrow | 1998–2007: Johnny Briceño | 2007–2008: Juan Vildo Marin | 2008–2016: Gaspar Vega | 2016–2020: Patrick Faber | 2020: Hugo Patt | 2020–: Cordel Hyde
1989–1993: Glenn Godfrey | 1993–1998: Henry Young | 1998–2004: Johnny Briceño | 2004: Juan Vildo Marin | 2004–2007: Johnny Briceño | 2007–2008: Florencio Marin Sr. | 2008–2012: Gaspar Vega | 2012–2015: Lisel Alamilla | 2015–2016: Gaspar Vega | 2016–: Godwin Hulse
–1981: Florencio Marin Sr. | 1984–1989: Dean Lindo | 1989–1993: Michael Espat | 1993–1998: Russell Garcia | 1998–2003: Daniel Silva | 2003–2004: Servulo Baeza | 2004–2006: Michael Espat | 2006–2008: Juan Vildo Marin | 2008–2012: Rene Jaime Montero | 2012–2016: Gaspar Vega | 2016–: Godwin Hulse