Repräsentantenhuus (Belize)

Dat Repräsentantenhuus (engelsch House of Representatives) von Belize is een von de twee Kamern von de Natschonaalversammlung von dat Land (de annere is de Senaat). Dat Parlament sitt in Belmopan.

Wahlrecht

Dat Repräsentantenhuus hett Stand 2019 31 Seten, de all fiev Johr na en Mehrheitswahlrecht nee wählt warrt. Dorför sünd de söss Distrikte von dat Land in 31 Wahlkreise indeelt. ’Keen in en Wahlkreis de mehrsten Stimmen kriggt, winnt den Seet.

De Person, de in en Wahlkreis för sien/ehr Partei as Kannedaat för de Wahl nomineert worrn is, warrt engelsch Standard Bearer nöömt un de Person, de denn ok würklich wählt warrt, warrt in Belize engelsch Area Representative nöömt.

De Parteibaas von de Partei, de bi de Wahl denn de mehrsten Stimmen kregen hett, warrt von’n Generaalguvernör as Premierminister insett.

De Spreker von dat Repräsentantenhuus (engelsch Speaker) is sülvs nich Maat von dat Repräsentantenhuus un hett keen Stimmrecht.

Historie

In Brietsch-Honduras (Vörlöper von dat Land Belize) hett dat 1954 de eersten allgemenen Wahlen geven. De brietsche Kolonie harrr toeerst en Eenkamersystem, in dat de Legislativversammlung de eenzige Parlamentskamer weer. To’n 1. Januar 1964 is düt System in en Tweekamersystem ümwannelt worrn mit en wählt Repräsentantenhuus un en beropen Senaat. Dat polietsche System von Belize stütt sik stark op brietsche Traditschonen un dat Repräsentantenhuus is dorbi mit dat House of Commons to verglieken, wieldes de Senaat mit dat House of Lords to verglieken is. Mit de ne’e Verfaten von Belize na de Unafhängigkeit is düt System noch maal bestätigt worrn.

Toeerst hett dat Repräsentantenhuus noch in Belize-Stadt seten, aver 1970 is Belmopan as ne’e Hööftstadt von Belize grünnt worrn un dat Parlament is in en Gebüüd an de Independence Plaza ümtagen, dat 1971 trech worrn is.

Vergangen Wahlen

As de Legislativversammlung to’n 1. Januar 1964 oplööst un in dat Repräsentantenhuus övergahn is, harr de Legislativversammlung 18 wählte Maten, de all 18 Maat von de People’s United Party (PUP) weren. Siet dat Repräsentantenhuus besteiht, is noch nie en Afornten för en annere Partei as de People’s United Party, de National Independence Party (NIP) oder de NIP ehr Nafolgerpartei United Democratic Party (UDP) wählt worrn. Dat hett aver al Fäll geven, wo Afornte jemehr Partei verlaten hebbt. Se weren denn as Parteilose in’t Parlament oder hebbt sik lüttjere Partein anslaten (to’n Bispeel siet 1992 Philip Goldson för de NABR).

Wahl	Seten	PUP	NIP/UDP
1965	18	16	2
1969	18	16	2
1974	18	12	6
1979	18	13	5
1984	28	7	21
1989	28	15	13
1993	29	13	16
1998	29	26	3
2003	29	22	7
2008	31	6	25
2012	31	14	17
2015	31	12	19
2020	31	26	5

Weblenken

Websteed von de Natschonaalversammlung (engelsch)