Curl Thompson

Curl Osmond Thompson (* 1934; † 21. Juli 1993) weer en Politiker ut Belize (UDP).

Thompson is 1934 boren.

Thompson is 1974 in’n Stadtraad von Belize-Stadt wählt worrn. 1977 is he wedderwählt worrn, aver bi de Wahl 1980 is he nich mehr wedderwählt worrn.

Bi de Parlamentswahl in Belize 1974 weer he Kannedaat för de UDP in’n Wahlkreis Mesopotamia un hett de Wahl mit 44,4 % von de Stimmen gegen C. L. B. Rogers von de PUP verloren. Bi de Wahl 1979 aver kunn he sik in’n sülven Wahlkreis mit 51,3 % von de Stimmen gegen Rogers dörsetten. Ok bi de Wahl 1984 (68,4 % gegen Myrtle Palacio, PUP) un de Wahl 1989 (53,1 % gegen Steve Latchman, PUP) hett he wedder wunnen.

Dormit weer he von’n 21. November 1979 bet 30. Juni 1993 Afornten von dat Repräsentantenhuus von Belize.

De eersten fiev Johren seet Thompson mit de UDP in de Oppositschoon. Nadem Theodore Aranda dat Amt as Parteibaas von de UDP in’n November 1982 afgeven hett, is Manuel Esquivel Parteibaas worrn. Esquivel weer aver nich Maat von dat Repräsentantenhuus un dorüm weer Thompson von Januar 1983 bet Dezember 1984 Oppositschoonsföhrer in dat Repräsentantenhuus.

Bi de Wahl 1984 is de UDP an de Macht kamen. Thompson weer ünner Premierminister Manuel Esquivel von 1984 bet 1989 Binnenminister un Viez-Premierminister (Kabinett Esquivel I).

Bi de Wahl 1989 hett de UDP de Macht wedder afgeven un Thompson hett de letzten veer Johren in de Oppositschoon seten.

Thompson is an’n 21. Juli 1993 na en Hartinfarkt doodbleven.

Ehren

Thompson hett in’n September 2010 posthum den Order of Belize kregen, de an siene Dochter Hilda övergeven worrn is.

In Belize-Stadt is de Curl Thompson Street na em nöömt un in Belmopan dat Curl Thompson Building.

Footnoten

Viez-Premierministers von Belize

1981–1984: C. L. B. Rogers | 1984–1989: Curl Thompson | 1989–1993: Florencio Marin Sr. | 1993–1998: Dean Barrow | 1998–2007: Johnny Briceño | 2007–2008: Juan Vildo Marin | 2008–2016: Gaspar Vega | 2016–2020: Patrick Faber | 2020: Hugo Patt | 2020–: Cordel Hyde