Hubert Elrington
Hubert Elrington is en Politiker ut Belize (UDP).
Wilfred Elrington is sien Broder.
Elrington hett Juristeree studeert un is Avkaat.
Bi de Parlamentswahl in Belize 1984 weer he Kannedaat för de UDP in’n Wahlkreis Lake Independence un hett de Wahl mit 52,4 % von de Stimmen gegen Carlos Diaz von de PUP wunnen. Bi de Wahl 1989 weer he in’n sülven Wahlkreis Kannedaat, hett de Wahl aver mit 46,2 % von de Stimmen gegen Diaz verloren.
Dormit weer he von 1984 bet 1989 Afornten von dat Repräsentantenhuus von Belize. He weer ünner Premierminister Manuel Esquivel von’n 17. Dezember 1984 bet 4. Juni 1986 Generaalstaatsanwalt un Minister för Huusbo in dat Kabinett Esquivel I. Dat Amt as Generaalstaatsanwalt hett he an’n 4. Juni 1986 afgeven un is bet 1989 Minister för Apentliche Arbeiden un Huusbo ween.
In’n November 1991 hett Belize en Gesett (den Maritime Areas Act) verafscheedt, dat Guatemala Rechten in dat Seerebeed in’n Süden von Belize toseggt. Dat Gesett stünn in’n Tosamenhang mit’n Grenzkunflikt twüschen Belize un Guatemala un schull bidregen, den Kunflikt bitoleggen. Dorüm weren PUP un UDP all beid för dat Gesett. Elrington, Philip Goldson un annere Maten in de UDP weren dormit aver untofreden un wullen Guatemala keen Togeständnisse maken. Dorüm hett düsse Grupp an’n 1. Dezember 1991 de Patriotic Alliance for Territorial Integrity grünnt, de an’n 27. Januar 1992 in de National Alliance for Belizean Rights (NABR) övergahn is. Elrington is aver noch vör de Wahl 1993 wedder to de UDP trügg.
Bi de Wahl 1993 harr Elrington mit 52,4 % wedder de Bavenhand gegen Carlos Diaz. De Wahl 1998 dorgegen güng mit 30,13 % von de Stimmen gegen Cordel Hyde von de PUP verloren. Bi de Wahl 2003 is Elrington nich mehr von de UDP opstellt worrn un as unafhängigen Kannedaat antreden. He hett blots 1,95 % von de Stimmen kregen un keem op’n veerten Platz achter Cordel Hyde för de PUP, Anthony Leslie för de UDP un den unafhängigen Patrick Rogers.
Dormit weer he von 1993 bet 1998 en tweet Maal Afornten von dat Repräsentantenhuus von Belize. In dat Kabinett Esquivel II weer he von 1993 bet 1998 Minister för Huusbo, Städtische Entwicklung un Kooperativen. He is 1993 ok Minister för Lokale Verwaltung worrn, wat he aver blots bet Januar 1995 bleven is, as he düt Amt an Elito Urbina afgeven hett. An’n 22. April 1997 hett he tosätzlich dat Ministerium för Arbeid un Binnensaken övernahmen, nadem Elito Urbina siene Ministerposten afgeven müss.
1981–1984: Said Musa | 1984: Vernon Harrison Courtenay | 1984–1986: Hubert Elrington | 1986–1989: Dean Barrow | 1989–1993: Glenn Godfrey | 1993–1998: Dean Barrow | 1998–1999: Richard Bradley | 1999–2003: Godfrey Smith | 2003–2004: Eamon Courtenay | 2004–2008: Francis Fonseca | 2008–2010: Wilfred Elrington | 2010–2012: Bernard Q. Pitts | 2012–2015: Wilfred Elrington | 2015–2017: Vanessa Retreage | 2017–2020: Michael Peyrefitte | 2020–: Magali Marin-Young
