Elito Urbina

Vun Wikipedia
Zur Navigation springen Zur Suche springen

Elito Omar Urbina is en Politiker ut Belize (PUP, UDP).

Urbina kummt ut Orange Walk un weer dor fröher Schoolmeester.

Bi de Parlamentswahl in Belize 1965 weer he Kannedaat för de PUP in’n Wahlkreis Orange Walk Noord un hett de Wahl mit 56,0 % von de Stimmen gegen Felipe Escalante von de NIP wunnen. Bi de Wahl 1969 weer he in’n sülven Wahlkreis Kannedaat un hett sik mit 52,5 % von de Stimmen gegen Ignacio Vega von de NIP dörsett. Bi de Wahl 1974 is he nich wedder antreden.

Dormit weer he von 1965 bet 1974 Afornten von dat Repräsentantenhuus von Belize.

In düsse Tied weer he Minister för Verkehr un Apentliche Arbeiden un ok Parlamentssekretär.

Nadem he ut dat Repräsentantenhuus rut is, hett Premierminister George Cadle Price em in’n Senaat beropen. He weer in de Tied von’n 8. November 1974 bet 27. Juli 1979 Präsident von’n Senaat.

Bi de Wahl 1993 is he för de UDP in’n Wahlkreis Orange Walk Noord antreden un harr mit 50,1 % von de Stimmen de Bavenhand gegen Santiago Rosado von de PUP.

Dormit weer Urbina von 1993 bet 1998 dat twete Maal Afornten von dat Repräsentantenhuus von Belize.

Ünner Premierminister Manuel Esquivel is he 1993 in dat Kabinett Esquivel II Binnenminister worrn. Tosätzlich is he in’n Januar 1995 Minister för Arbeid un Lokale Verwaltung worrn. Düt Amt harr he von Elodio Aragon Senior övernahmen.

An’n 22. Mai 1996 is Urbino sien Dochtermann Ermelito Vasquez fastnahmen worrn, as he versöcht hett, mit en Fleger 386 kg Kokain von Panama na Belize to smuggeln, wat de US-amerikaansche DEA mitkregen hett. Nadem dat Polizeifohrtüüg, dat de Bewiesen gegen Vasquez transporteren dee, in Flammen opgahn is, is Vasquez an’n 2. Dezember ut Mangel an Bewiesen freespraken worrn. De Polizei stünn to düsse Tied ünner de Opsicht von Binnenminister Urbina, wat dorto föhrt hett, dat en Reeg Lüüd argwöhnt hebbt, dat Urbina dor wat mit to doon harr.

Ünner annern düsse Kritik hett mit dorto föhrt, dat Urbina an’n 22. April 1997 siene Ämter as Minister afgeven müss. He is in’n April 1997 as Baadschopper von Belize in Mexiko na Mexiko-Stadt versett worrn, wat he bet 1998 bleven is.