Elodio Aragon Senior
Elodio Aragon (Senior; * 1948) is en Politiker ut Belize (UDP).
Aragon is 1948 boren.[1] He hett dat Muffles College in Orange Walk un dat Belize Teachers College in Belize-Stadt besöcht.[1] He hett teihn Johr as Schoolmeester arbeidt un weer Viez-Präsident von de Orange Walk Teachers Union.[1]
In de Politik is he toeerst as Maat von’n Stadtraad von Orange Walk rinkamen.[1]
He weer bi de Parlamentswahl in Belize 1979 Kannedaat för de UDP in’n Wahlkreis Orange Walk Noord un hett mit 49,1 % von de Stimmen gegen Elijio Briceno von de PUP verloren. He is in düsse Wahlperiood von de UDP denn as Senater in’n Senaat beropen worrn.[1]
Bi de Wahl 1984 weer he för de UDP Kannedaat in’n Wahlkreis Orange Walk Oost un hett sik mit 60,4 % von de Stimmen gegen Ramon Cervantes von de PUP dörsett. Ok bi de Wahl 1989 (54,1 % gegen Ramon Cervantes) un bi de Wahl 1993 (53,6 % gegen Ramon Cervantes) harr he de Bavenhand.
Bi de Wahl 1998 hett he mit 42,82 % von de Stimmen gegen Dave Burgos von de PUP verloren. Ok bi de Wahl 2003 hett he dat noch wedder versöcht, kunn sik mit 46,71 % aver wedder nich gegen Burgos dörsetten.
Dormit weer Aragon von 1984 bet 1998 in dat Repräsentantenhuus von Belize.
He weer von 1984 bet 4. Juni 1986 ünner Premierminister Manuel Esquivel Minister för Gesundheit, Arbeid un Sport un denn von’n 4. Juni 1986 bet 1989 Minister för Bildung, Sport, Kultur un Junge Lüüd in dat Kabinett Esquivel I.
Ok in dat Kabinett Esquivel II (1993–1998) weer he Minister för Bildung, Apentlichen Deenst un Arbeid. Dat Ministerium för Arbeid hett he aver in’n Januar 1995 an Elito Urbina afgeven.
Aragon leevt in Orange Walk. An’n 10. Januar 2019 is he in sien Huus in Orange Walk von twee Personen överfullen un kidnappt worrn.[2] De Kidnappers hebbt em later en poor Mielen buten Orange Walk an de Posito Road (Siedenstraat von’n Philip Goldson Highway) utsett. Sien Söhn Elodio Aragon Junior is ok Politiker.
Footnoten[ännern | Bornkood ännern]
- ↑ a b c d e The International Year Book and Statesmen’s Who’s who. Burke's Peerage Limited, 1998, Sied 672
- ↑ Rowland A. Parks: Elodio Aragon, Sr., kidnapped and released, Amandala an’n 12. Januar 2019
1963–1979: C. L. B. Rogers | 1979–1984: Assad Shoman | 1984–1986: Elodio Aragon Senior | 1986–1989: Israel Alpuche | 1989–1993: Theodore Aranda | 1993–1997: Ruben Campos | 1997–1998: Salvador Fernandez | 1998–1999: Servulo Baeza | 1999–2004: Jose Coye | 2004–2006: Juan Vildo Marin | 2006–2008: Jose Coye | 2008–2020: Pablo Marin | 2020–: Michel Chebat