John Smith (Politiker, 1919)

Vun Wikipedia

John A. Smith (* 9. Mai 1919; † 15. Mai 2012 in Metairie, Louisiana) weer en Politiker ut Brietsch-Honduras (PUP).

Smith is 1919 in Brietsch-Honduras boren.[1] He güng later op dat St. John’s College in Belize-Stadt.[1]

Smith weer von 1944 bet 1955 Maat von’n Stadtraad von Belize-Stadt un is 1947 un 1950 as Börgermeester von de Stadt wählt worrn.[1] He weer Viez-Präsident von de General Workers’ Union (GWU) un von 1948 bet 1954 Maat von de Legislativversammlung von Brietsch-Honduras.[1]

In dat Johr 1948 weer he Mitgrünner von dat People’s Committee, dat en wichtige Kiemzell för de Unafhängigkeitsbewegung in Brietsch-Honduras weer.[1] An’n 29. September 1950 hett sik ut dat People’s Committee de People’s United Party (PUP) billt un Smith is as eersten Parteibaas von de PUP wählt worrn.[1] 1952 hett he dat Amt as Parteibaas an Leigh Richardson afgeven, wat denn ok dorto föhrt hett, dat he de Partei verlaten hett.[1]

Bi de Parlamentswahl in Brietsch-Honduras 1954 weer he unafhängigen Kannedaat in’n Wahlkreis Belize Noord. He hett 25,0 % von de Stimmen kregen un kunn sik dormit nich gegen George Price dörsetten, de för de PUP antreden weer.

En Tied later is he in de USA utwannert un hett denn in Metairie bi New Orleans leevt.[1] Dor is he an’n 15. Mai 2012 doodbleven.[1] Siene Truurfier weer an’n 19. Mai in de St. Phillip Neri Church in Metairie.[1] Ofschoonst sien Bidrag dör de korte Tied, in de he PUP-Maat weer, vergleken mit de annern groten PUP-Politikers ut siene Tied (Philip Goldson, Nicholas Pollard, Leigh Richardson un George Price) ringer weer, gellt he doch as een von de fiev Vaders von de PUP un de Unafhängigkeitsbewegung, de 1983 dorto föhrt hett, dat Belize en egen Staat worrn is.[2] Smith weer 2012 ok de letzte, de von de fiev noch leven dee.

Smith weer verheiraadt mit Consuelo Smith, borene Riverol.[1] De beiden harrn veer Döchter.[1]

Footnoten[ännern | Bornkood ännern]

  1. a b c d e f g h i j k l PUP’s first leader dies in the USA, San Pedro Sun an’n 16. Mai 2012
  2. First PUP Leader Passes, 7 News Belize an’n 16. Mai 2012