Wilfred Elrington

Vun Wikipedia
(wiederwiest vun Wilfred Peter Elrington)
Wilfred Elrington 2014

Wilfred Peter Elrington (* 20. November 1948 in Belize-Stadt) is en Avkaat un Politiker (UDP) ut Belize.

Leven[ännern | Bornkood ännern]

Elrington is 1948 in Belize-Stadt (to de Tied de Hööftstadt von de Kolonie Brietsch-Honduras) boren. Hubert Elrington is sien Broder. Elrington hett an de University of the West Indies Juristeree studeert un is Avkaat in de Kanzlie Pitts & Elrington in Belize-Stadt.

He is verheiraadt mit Barbara Yolanda Jean Elrington, borene Wright. De beiden hebbt veer Kinner.

Politik[ännern | Bornkood ännern]

Bi de Parlamentswahl in Belize 1993 weer he Kannedaat för de UDP in’n Wahlkreis Pickstock un hett de Wahl mit 47,1 % von de Stimmen gegen George Cadle Price von de PUP verloren.

He is denn aver 1993 von Premierminister Manuel Esquivel in’n Senaat beropen worrn, von den he bet 1998 Maat weer.

Bi de Wahl 1998 is he in’n sülven Wahlkreis nochmaal gegen Price antreden un hett de Wahl mit 45,71 % von de Stimmen wedder verloren. Bi de Wahl 2003 hett em de UDP nich wedder as Kannedaat opstellt un Elrington is as unafhängigen Kannedaat in’n Wahlkreis Pickstock antreden. Dorbi hett he 27,25 % von de Stimmen haalt un keem op’n tweten Platz achter Godfrey Smith von de PUP un noch vör Diane Haylock von de UDP.

To de Wahl 2008 hett de UDP em dorüm wedder as Kannedaat opstellt un Elrington hett de Wahl mit 56,30 % gegen Godfrey Smith wunnen. Ok bi de Wahlen 2012 (51,11 % gegen Francis Donald Smith, PUP) un 2015 (48,89 % gegen Francis Smith, PUP, un Patrick Rogers, BPP) kunn he sik dörsetten.

Dormit is he siet 7. Februar 2008 Afornten von dat Repräsentantenhuus von Belize. An’n 12. Februar 2008 is he ünner Premierminister Dean Barrow Butenminister, Minister för Butenhannel un Generaalstaatsanwalt in dat Kabinett Barrow I worrn. Dat Amt as Generaalstaatsanwalt müss he an’n 1. Juni 2010 an Bernard Q. Pitts afgeven.

In dat Kabinett Barrow II weer he von’n 9. März 2012 bet 9. November 2015 ok wedder Butenminister un hett dat Amt as Generaalstaatsanwalt wedder von Pitts trüggkregen.

In dat Kabinett Barrow III weer he von’n 9. November 2015 bet 16. November 2020 blots noch Butenminister.

An’n 13. Dezember 2016 is he tosätzlich Binnenminister (mit Tostännigkeit för de Polizei) worrn, wat he ok bet to’n 16. November 2020 bleven is. Vör de Wahl 2020 hett he in’n März 2018 de UDP-Vörwahl in’n Wahlkreis Pickstock gegen Anthony Mahler verloren un stünn dormit nich wedder to Wahl.

Weblenken[ännern | Bornkood ännern]

Wilfred Elrington. Mehr Biller, Videos oder Audiodateien to’t Thema gifft dat bi Wikimedia Commons.