Diane Haylock

Haylock 2016 mit Tsai Ing-wen

Diane Carla Haylock is en Künstlerin, Aktivistin, Politikerin (UDP) un Diplomatin ut Belize.

Haylock hett an dat York College in New York City en Bachelor of Arts in Speech maakt un an dat International Institute of Social Studies in Den Haag (Nedderlannen) en Master in Developmental Studies.

Se weer siet de Johren 1970 in de Kunstszeen von Belize aktiv un hett sik tosätzlich feministisch engascheert. Se hett as Schauspelerin un Speelbaas mit de Square Peg Players un mit de Belize Theatre Company arbeidt, ünner annern in dat Bliss Centre. Polietsch hett se sik de United Democratic Party (UDP) anslaten.

1987 is se bi de Society for the Promotion of Education and Research (SPEAR) anfungen un dor later Executive Director ween.

Bi de Parlamentswahl in Belize 2003 weer se Kannedatin för de UDP in’n Wahlkreis Pickstock. Se hett blots 15,64 % von de Stimmen kregen un keem dormit op’n drüdden Platz achter Godfrey Smith von de PUP un den unafhängigen Wilfred Elrington.

Von Februar 2008 bet 2016 weer se as Nafolgerin von Yasser Musa Präsidentin von dat National Institute of Culture and History (NICH).

Haylock is siet 22. Juli 2016 Baadschopperin för Belize in de Republik China (Taiwan) mit Seet in Taipeh. 2018 is se tosätzlich as Baadschopperin in Japan akkrediteert worrn.

Weblenken

Diane Haylock. Mehr Biller, Videos oder Audiodateien to’t Thema gifft dat bi Wikimedia Commons.