Derek Aikman

Derek Edwin Leopold Aikman (* 15. November 1959; † 2. März 2019) weer en Politiker ut Belize (UDP).

Leven

Aikman is 1959 boren. Vör siene Tied in de Politik hett he en Tied in de USA leevt un dor för Air Florida arbeidt.

He weer verheiraadt mit Kim Aikman un harr mit ehr dree Kinner.

He is an’n 2. März 2019 doodbleven. Siene Truurfier weer an’n 7. März in de St. John’s Cathedral un is von Bischop Philip Wright hollen worrn.

Politik

Bi de Parlamentswahl in Belize 1984 weer he Kannedaat för de UDP in’n Wahlkreis Freetown un hett de Wahl mit 59,5 % von de Stimmen gegen George Cadle Price von de PUP wunnen. Price weer vörher över lange Johren Premierminister ween un kunn dormit nich wedder in dat Repräsentantenhuus von Belize intehn. Dat hett 1984 för groot Opsehn sorgt, dat en 25 Johr jungen Keerl George Price slahn hett.

Price is bi de Wahl 1989 denn in’n Wahlkreis Pickstock antreden, so dat dat nich wedder to en Duell mit Aikman keem. Aikman hett 1989 in’n Wahlkreis Freetown 55,1 % von de Stimmen haalt un dormit Araceli Krohn von de PUP slahn.

In’n November 1991 hett Belize en Gesett (den Maritime Areas Act) verafscheedt, dat Guatemala Rechten in dat Seerebeed in’n Süden von Belize toseggt. Dat Gesett stünn in’n Tosamenhang mit’n Grenzkunflikt twüschen Belize un Guatemala un schull bidregen, den Kunflikt bitoleggen. Dorüm weren PUP un UDP all beid för dat Gesett. Aikman un annere Maten in de UDP ünner Leid von Philip Goldson weren dormit aver untofreden un wullen Guatemala keen Togeständnisse maken. Dorüm hebbt se an’n 1. Dezember 1991 de Patriotic Alliance for Territorial Integrity grünnt, de an’n 27. Januar 1992 in de National Alliance for Belizean Rights (NABR) övergahn is.

In’n Dezember 1992 is Aikman denn as bankrott verkloort worrn un hett so sien Mandaat in’t Repräsentantenhuus verloren. Dorüm hett dat an’n 27. Januar 1993 en Nawahl in’n Wahlkreis Freetown geven. As Aikman sien Nafolger wählt worrn is Jorge Luis Espat von de PUP.

Aikman weer von’n 14. Dezember 1984 bet Dezember 1992 Afornten von dat Repräsentantenhuus. He weer in düsse Tied ünner Premierminister Manuel Esquivel von 1984 bet 1989 Minister för Verkehr un von 1984 bet 4. Juni 1986 ok Minister för Bildung, Kultur, Junge Lüüd un Tourismus in dat Kabinett Esquivel I.

Bi de Wahl 1998 hett he en Comeback bi de UDP versöcht un weer Kannedaat in’n Wahlkreis Fort George. He hett aver blots 24,82 % von de Stimmen kregen un düüdlich gegen Said Musa von de PUP verloren.

Footnoten

Ministers för Tourismus von Belize

1984–1986: Derek Aikman | 1986–1989: Eduardo Juan | 1989–1993: Glenn Godfrey | 1993–1998: Henry Young | 1998–2004: Mark Espat | 2004–2008: Godfrey Smith | 2008–: Manuel Heredia