George Price Highway

Vun Wikipedia
Zur Navigation springen Zur Suche springen
Highways in Belize. W is de George Price Highway
Straat twüschen San Ignacio un Belmopan (2007)
Straat in Hattieville (2007)
Straat bi San Jose Succotz (2007)

De George Price Highway (oder ok Western Highway) is een von de veer groten Highways in dat Land Belize. De Highway is 124,3 Kilometer lang un föhrt von Belize-Stadt dör de Distrikte Belize un Cayo över de Öörd Hattieville, Belmopan un Santa Elena/San Ignacio na Benque Viejo del Carmen an de Grenz to dat Departamento Petén, Guatemala. De Straat is dörgahns asphalteert un hett twee Sporen.

Verloop[ännern | Bornkood ännern]

De Anfang is in Belize-Stadt an’n Central American Boulevard. De Boulevard verbinnt den George Price Highway mit’n Philip Goldson Highway, de von Belize-Stadt na Orange Walk un Corozal in’n Noorden von dat Land föhrt. Von’n Central American Boulevard löppt de Highway na Süüdwesten, toeerst an’n Burdon Canal langs un denn mit en Brügg över’n Canal röver. He geiht dör de Öörd Western Paradise un Tropical Park. Twüschen Tropical Park un Hattieville geiht na Noorden de Burrell Boom Cutoff af, de en Afkörten twüschen George Price Highway un Philip Goldson Highway is, so dat een nich dör Belize-Stadt dör mutt.

Vör Hattieville geiht de Highway mit en Brügg över’n Hector Creek. De Straat löppt nu en ganze Tied in en Afstand von en poor Kilometer parallel to’n Sibun River un dör de Öörd Rockville, Jih Chan, La Democracia un Mahogany Heights. Kort achter Mahogany Heights löppt de Straat över de Grenz na’n Distrikt Cayo un dor dör de Öörd St. Matthew’s, Beaver Dam (mit Brügg över’n Beaver Dam Creek) un Cotton Tree. De Highway löppt an’n Noordrand von de Hööftstadt Belmopan langs un drippt dor op’n Hummingbird Highway, de na Dangriga föhrt.

De Straat föhrt denn mit en Brügg över’n Roaring Creek un löppt nu groff parallel to’n Belize River dör de Öörd Roaring Creek, Camalote, Teakettle, Ontario, Blackman Eddy, Unitedville, Georgeville (dor geiht de Chiquibul Road na Süden af), Central Farm un Esperanza.

Esperanza is al en Vöroort to’n Dubbeloort San Ignacio/Santa Elena, de op de beiden Övers von’n Mopan River liggt. De Straat föhrt wieder na San Jose Succotz un na Benque Viejo del Carmen. Dat is de letzte Oort vör de Grenz na Guatemala un den Oort Melchor de Mencos. De Brügg över’n Mopan River liggt al op dat Rebeed von Guatemala. Op de annere Sied von de Grenz geiht de Straat as CA 13 wieder. De Grenzövergang is de eenzige offizielle Grenzövergang twüschen Belize un Guatemala. För de Tokumst is en tweten Övergang an de San Antonio Road plaant (Stand 2019).

De Fohrtied von Belize-Stadt na de Grenz to Guatemala bedriggt üm un bi twee Stünnen.

Historie[ännern | Bornkood ännern]

De Straat is in de Johren 1930 as Western Highway inricht worrn.

De Straat güng toeerst över Ladyville un denn bi Burrell Boom mit en Fähr över’n Belize River. Eerst 1949/1950 is de Straat von Belize-Stadt na dat hüdige Hattieville anleggt worrn. Düsse knapp 23 Kilometer lange Straat is in de Tied Hector Creek Road nöömt worrn. De Straat weer temlich opwännig un düür, denn se geiht merrn dör sied Mangrovenholt. De Straat weer 1949 trech, aver dat hett noch bet 1950 duurt bet ok de Brügg över’n Burdon Canal trech weer, wat en Hoogbrügg ween müss von wegen den Bootsverkehr op’n Kanaal. Dör de Hector Creek Road is de Weg von Belize-Stadt na’n Westen üm un bi 19 Kilometer körter worrn.

An’n 21. September 2012 hett Premierminister Dean Barrow kund daan, dat de Highway to Ehren von’n Politiker George Price den ne’en Naam George Price Highway kriggt.[1]

Footnoten[ännern | Bornkood ännern]

  1. Two highways renamed on Independence Day in honor of National Heroes, The San Pedro Sun an’n 29. September 2012

Weblenken[ännern | Bornkood ännern]

Commons-logo.svg George Price Highway. Mehr Biller, Videos oder Audiodateien to’t Thema gifft dat bi Wikimedia Commons.