Tropical Park

Tropical Park is en Oort in’n Distrikt Belize von dat Land Belize. De Oort höört to de Gemeen Hattieville.

Geografie

De Oort liggt an dat Noordöver von’n Hector Creek, de söven Kilometer in’n Süüdoosten von’n Oort in’n Sibun River münnt. Dat Rebeed in’n Noorden is vör allen Sump.

De Naveröörd sünd Burrell Boom in’n Noorden, Lords Bank un Ladyville in’n Noordoosten, Western Paradise in’n Oosten, Freetown Sibun in’n Süüdoosten, Hattieville in’n Süden, Rockville in’n Süüdwesten un Double Head Cabbage un Bermudian Landing in’n Noordwesten.

Historie

An de Steed von’n Oort leeg vörher de Cashew-Farm Rancho del Sol. 1960 is Emory King Manager von düsse Farm worrn. King hett dat Land denn övernahmen un dor en Boprojekt vörandreven. Dat Projekt dee sik vör allen an Expats richten, de jemehr Rohstand in Belize tobringen wullen. Emory King hett sülvs bet to sien Dood 2007 in Tropical Park leevt.

Weertschop un Infrastruktur

De Oort is üm un bi 22 Kilometer von Belize-Stadt weg.

Verkehr

De Oort liggt an’n George Price Highway, de in’n Noordoosten na Belize-Stadt löppt un in’n Süüdwesten na Belmopan, San Ignacio/Santa Elena un Benque Viejo. In Tropical Park geiht von’n George Price Highway na Noorden de Burrell Boom Cutoff af, de na’n Oort Burrell Boom un denn an’n Philip Goldson Highway föhrt.

De Philip S. W. Goldson International Airport liggt teihn Kilometer in’n Noordoosten.