Melchor de Mencos

Vun Wikipedia
Zur Navigation springen Zur Suche springen
Zentrum von Melchor de Mencos

Melchor de Mencos is en lüttje Stadt in dat Municipio Melchor de Mencos, Departamento Petén, Guatemala. Dat is de Hööftoort von dat Municipio un liggt direkt an de Grenz na Belize mit de Stadt Benque Viejo del Carmen. De Oort hett üm un bi 4000 Inwahners.

Geografie[ännern | Bornkood ännern]

De Oort liggt an’n Mopan, de aver binnen de Stadt blots för en lütt Enn von knapp 600 Meter dör dat Rebeed von Guatemala flütt un ans dör Belize. De Garbutt’s Falls an’n Mopan sünd an’n 30. April 1859 in’n Wyke-Aycinena-Verdrag as Grenzpunkt twüschen Belize un Guatemala fastleggt worrn.

De Oort liggt an’n Noordwestrand von de Maya-Bargen.

Historie[ännern | Bornkood ännern]

De Oort is 1869 as Fallabón von’n US-amerikaanschen Ünnernehmer Carlos Carrol grünnt worrn, de in dat Rebeed Holt fällt un dat över Mopan un Belize River na de Küst flött hett. Ok de Chicle-Industrie weer in de eerste Tied von Belang för’n Oort.

Fallabón leeg in dat Municipio Flores. An’n 26. April 1962 hett de Regeren von Guatemala beslaten, dat de Aldea Fallabón mit de Aldea Plancha de Piedras tohoopleggt warrt un de beiden Öörd tohoop as Stadt den ne’en Naam Melchor de Mencos dragen schöölt, na’n spaanschen Militär Melchor de Mencos y Varón, de 1754 de Briten slahn hett, wat as wichtigen Punkt ansehn worrn is, üm de in Belize aktiven Briten ut Guatemala trüggtohollen. Gliektiedig is dat Municipio Melchor de Mencos ut dat Municipio Flores utlagert worrn un de ne’e Stadt is Hööftoort von dat Municipio worrn.

Infrastruktur un Weertschop[ännern | Bornkood ännern]

De Straat CA-13 löppt von Melchor de Mences in’n Oosten op Flores to. Düsse Straat geiht ok mit en Grenzövergang över de Grenz na Belize un löppt dor as George Price Highway wieder över Benque Viejo del Carmen un San Ignacio/Santa Elena na Belmopan un Belize-Stadt.

Weblenken[ännern | Bornkood ännern]

Commons-logo.svg Melchor de Mencos. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:17° 4′ N, 89° 9′ W