CA-13
De CA-13 is en Straat, de to dat Stratennett von de Rutas Centroamericanas tohöört un dör de Staten Honduras un Guatemala föhrt. Binnen Honduras is de Straat 481 Kilometer lang un binnen Guatemala 372 Kilometer.
Verloop
[ännern | Bornkood ännern]De Straat nimmt ehren Anfang in Puerto Castilla an de Küst von de Karibische See in dat Departamento Colón, Honduras. Von dor löppt se toeerst na Süüdoosten, an Trujillo langs över Colonia Aguán mit en Brügg över’n Río Aguán na Corocito. Dor geiht de Ruta Nacional 39 af un de CA-13 dreiht na Süüdwesten. Se föhrt över Tocoa na Sabá. Von Colonia Aguán bet Sabá föhrt se dör dat Aguán-Daal. In Sabá geiht na Süüdwesten de Ruta Nacional 23 af un de CA-13 dreiht wedder op en Noordwest-Kurs över’n Río Aguán un denn över Jutiapa un Sambo Creek groff de Küst langs wieder na Westen över La Ceiba, San Juan Pueblo, Arizona, dör dat Leán-Daal üm de Montaña el Tiburón rüm un över Tela na El Progreso. In düsse Stadt geiht de Straat över’n Río Ulúa un denn na San Pedro Sula.
In San Pedro Sula drippt de Straat op de Sierra del Omoa, de den direkten Weg na Westen versperrt. De CA-13 verlöppt dorüm tohoop mit de CA-5 in en groten Bagen in’n Noorden üm de Bargen rüm. Se löppt över Choloma na Puerto Cortés un denn över Omoa na Cuyamel. Bi Corinto löppt se över de Staatsgrenz na Guatemala un geiht dor denn över’n Río Motagua un an de Havenstadt Puerto Barrios vörbi na Morales. Dor trennt sik CA-13 un CA-9 wedder. De CA-9 löppt na Süüdwesten un de CA-13 na Noordwesten över’n Río Dulce un wieder na Modesto Méndez, Chacte, San Luis, Poptún, Dolores, El Chal un Flores. Bi Flores dreiht de Straat na Noordoosten un föhrt na Melchor de Mencos an de Grenz to Belize. Achter de Grenz löppt se in Belize as George Price Highway wieder na Belmopan un Belize-Stadt.
