CA-4

Vun Wikipedia

De CA-4 is en Straat, de to dat Stratennett von de Rutas Centroamericanas tohöört un dör de Staten El Salvador un Honduras föhrt. Binnen El Salvador is de Straat 129 Kilometer lang un binnen Honduras 247 Kilometer.

Verloop[ännern | Bornkood ännern]

De Straat nimmt ehren Anfang an de Pazifikküst in Puerto de La Libertad. Dor is se an de CA-2 anbunnen, de de Küst langs löppt. De CA-4 föhrt in’n Noorden över Zaragoza na San Salvador, wo se en Stück identisch mit de CA-1 is. Von San Salvador föhrt se wieder na Noorden över Apopa, Guazapa un Aguilares na Caserío Colima an’n Río Lempa, över den de Straat mit en Brügg röverföhrt. In Aguaje Escondido krüüzt se de CA-3 un löppt na Tejutla, La Palma un San Ignacio. In Citalá kummt de Straat an de Staatsgrenz na Honduras. In Honduras geiht de CA-4 dör Antigua Ocotepeque un Nueva Ocotepeque. In Sinuapa münnt de CA-10 in de CA-4. Von dor löppt de Straat na Noordoosten un kummt na La Labor. Achter La Labor münnt de Ruta Nacional 116 in de CA-4, de nu an Sensenti langs över Santa Cruz na Lucerna un Cucuyagua (RN-132) löppt. In Santa Rosa de Copán is de CA-4 an de CA-11A anbunnen un in La Entrada an de CA-11. Bi Trinidad de Copán is de Straat dorbi in dat Daal von’n Río Tepemechín kamen un löppt von Lan Entrada bet an ehr Enn dör dat Daal von’n Río Chamelecón. De Straat löppt över Sula un Quimistán, is in La Ceibita an de RN-20 anbunnen un geiht na Cofradía. In Chamelecón münnt se in de CA-5, de in’n Noorden na San Pedro Sula, Choloma un Puerto Cortés föhrt un in’n Süden na Siguatepeque, Comayagua un Tegucigalpa.