Río Chamelecón
| Río Chamelecón | ||
|---|---|---|
| Laag | Honduras | |
| ||
| Stroomsystem | Río Chamelecón | |
| Läng | 262 km | |
| Born | bi Santa Elena | |
| Koordinaten Born: | 14° 57′ N, 88° 51′ W | |
| Münn | bi Barra Chamelecón in de Karibische See (op 0 m över de See) | |
| Koordinaten Münn: | Koordinaten:15° 54′ N, 87° 47′ W15° 54′ N, 87° 47′ W | |
| linke Blangenströöm | Río Tiste, Río Chinamito, Quebrada La Grita, Río Chiquila, Río Culupa, Río Blanco | |
| rechte Blangenströöm | Río Tepemechín, Río Blanco, Río Tapalapa, Río Cacaulapa | |
 | ||
De Río Chamelecón oder ok Río Chamalecón is en üm un bi 262 Kilometer langen Stroom in Honduras, de in de Karibische See münnt.
De Stroom billt sik in de Sierra Gallinero bi dat Dörp Santa Elena (Departamento Copán) an de Steed, an de Río Chiquito un Río Pasquingual tohoopfleten doot. De Río Chiquito is bet dorhen so üm un bi ölven Kilometer lang un de Río Pasquingual (mit Quebrada Resumidero) good 20 Kilometer. Mit siene Bornströöm rekent is de Río Chamelecón also üm un bi 282 Kilometer lang.
Von Santa Elena flütt de Stroom na Noordoosten, vörbi an Florida un La Entrada. Bi Florida nimmt he von links den Río Tiste op, bi Goascorán von links den Río Chinamito un bi La Entrada von rechts den Río Tepemechín. Tosätzlich löppt bi Florida de Straat CA-11 mit en Brügg över’n Stroom. Twüschen Florida un Callejones flütt de Stroom dör en breed Daal, bevör he denn wedder dör de Bargen dörbrickt. Bi Seis de Mayo/Callejones an de Münn von de Quebrada La Grita (von links) kummt de Stroom ok op dat Rebeed von dat Departamento Santa Bárbara. Hier geiht de Straat CA-4 mit en Brügg över’n Río Camalecón röver. In de Neegd von Sula kummt he wedder in en breder Daal (dat Valle de Quimistán) un nimmt hier von links den Río Chiquila, von rechts Río Blanco un Río Tapalapa un bi La Flecha von links den Río Culupa op. He flütt vörbi an San Marcos, Quimistán un La Ceibita. Bi La Ceibita münnt von rechts de Río Cacaulapa. Bi Cofradía flütt he op dat Rebeed von dat Departamento Cortés.
Twüschen Santa Elena un Chamelecón brickt de Stroom wedder twüschen de Bargen dör un flütt dor denn in dat wiede Sula-Daal, in dat he bet na siene Münn blifft. In Chamelecón geiht de CA-5 mit en Brügg över’n Stroom. De Río Chamelecón löppt an San Pedro Sula langs un dör La Lima. Bi de Laguna Jucutuma nimmt he von links den Río Blanco op. De Loop is denn parallel to’n Río Ulúa. Bi Baracoa verlett de Stroom sien oorsprünglichen Loop un flütt för 13 Kilometer dör en Kanaal. De üm un bi 25 Kilometer lange ole Loop verlöppt wieder in’n Westen un besteiht noch, dor flütt aver kuum noch Water dör. De ole Loop is ok dör en Kanaal an de Laguna de Alvarado bi Puerto Cortés anbunnen.
Toletzt münnt de Río Chamelecón bi dat Dörp Barra Chamelecón in de Karibische See. De Münn is as Natschonaalpark Jeanette Kawas schuult.
