Gericht Delm

Dat Wapen von de Gemeen Obbens wiest en panzert Arm mit Richtsweert. Dat is dat ole Segel von dat Gericht Delm

Dat Gericht Delm weer en Patrimonialgericht un Verwaltungsrebeed in Bremen-Veern un in dat Königriek Hannover mit Seet in Obbens binnen de Landdrostie Stood. Dat Rebeed von dat Gericht höört vondaag to de Samtgemeen Obbens un de Gemenen Bliersdörp, Nottensdörp, Buxthu un Harsfeld. Gerichtsherrn weren toletzt de Familien von Düring, von Zesterfleth, von Schulte un von dem Bussche. Dat weren ünner annern de Goodsherrn von dat Good Wiegersen. De Goodsherrn von Good Wiegersen weren ok Gerichtsherrn von dat Gericht Jeem.

Geografie

In’n Noorden von dat Gericht legen dat Gericht Hornborg un dat Grevengericht Oolland, in’n Oosten de Stadt Buxthu, de Vaagdie Oold- un Neeklooster von dat Amt Harsfeld un dat Amt Mesborg in’n Süden dat Amt Zeven un in’n Westen de Rest von dat Amt Harsfeld (Stand 1848).

Historie

Dat Gericht keem 1432 toeerst in de Oorkunnen vör. Dat hett to uppe deme delve heten. Dat kummt af von en oold Woord för Graven (kiek bi Delf) un hett de Laag von’n Gerichtsplatz betekent. In dat Vörer Register kummt üm 1500 al de Schrievwies upp dem delme vör. In disse öllste Tied hett de Familie von Borch de Gerichtsherrn stellt, de dat Gericht vörher von de Familie von Bliersdörp arvt hett. De von Borch sünd üm 1500 utstorven. Ünner annern de von Düring hebbt denn as Gerichtsjunker övernahmen.

De Richtsteed von dat Gericht leeg in Obbens un warrt ok nu noch Galgenbarg nöömt.

Dat Gericht harr toeerst ok de hoge Gerichtsborkeit un kunn to’n Bispeel de Doodsstraaf verhängen. Later harr dat Gericht blots noch de neddere Gerichtsborkeit. Von 1753 af an hebbt de Hertogdömer Bremen un Veern mit de Ünnergerichtsordnung verföögt, dat blots noch studeerte Juristen Recht spreken dröfft.

1810 hett Frankriek ünner Napoleon dat Gericht innahmen. In disse Franzosentied hett dat toeerst bet to’n 31. Dezember 1810 to dat Departement von de Elv- un Wersermünn in dat Königriek Westfalen höört un denn to dat Departement von de Elvmünnen un direkt to Frankriek. Dat Rebeed von dat Gericht hett in disse Tied in’n Kanton Hornborg legen. 1813 müssen de Franzosen dat Rebeed denn opgeven un de ole Stand is wedderkamen.

1848 weer dat Gericht so 121,21 km² groot.

An’n 12. Mai 1852 is dat Patrimonialgericht ophoven un in en königlich Gericht ümwannelt worrn.

Bi de Verwaltungs- un Justizreform an’n 1. Oktober 1852 sünd Verwaltung un Justiz kumplett trennt worrn. De Verwaltungsnafolger von dat Gericht Delm weer dat ne’e Amt Hornborg, för de Justiz weer dat Amtsgericht Buxthu tostännig.

Öörd Stand 1848

	Oort	Lüüd	Hüüs	Aard	Status
1	Obbens	520	80	Dörp	Gemeen
2	Beekdörp	213	32	Dörp	Gemeen
3	Bliersdörp mit de enkelten Hüüs von Postmoor un de Vördermöhl	506	77	Dörp	Gemeen
4	Borrel	51	6	Dörp	Gemeen
	Kommerbusch	58	9	Dörp
	Remnoh	45	8	Dörp
5	Dammhusen	234	43	Dörp	Gemeen
6	Guldbeek	139	24	Dörp	Gemeen
	Guldbeker Möhl	8	2	Möhl
7	Grundolendörp	58	10	Dörp	Gemeen
8	Heendörp	346	54	Dörp	Gemeen
9	Heitmannshusen	24	4	Dörp	Gemeen
10	Nindörp	138	23	Dörp	Gemeen
11	Nottensdörp mit de enkelten Hüüs von Schragenkamp	298	50	Dörp	Gemeen
	Good Nottensdörp	18	8	Eddelgood	ahn Gemeen
12	Ottens mit dat enkelte Huus Ilsdiek	190	27	Dörp	Gemeen
13	Ruschwedel	108	14	Dörp	Gemeen
14	Wiegersen	130	20	Dörp	Gemeen
	Good Wiegersen	23	3	Eddelgood	ahn Gemeen

Inwahnertall

Johr	Inwahners
1810-00-001810	2.040 Lüüd, 363 Füürsteden
1823-00-001823	2.259 Lüüd, 379 Hüüs
1848-00-001848	3.107 Lüüd, 494 Hüüs

Richters

• ~1829: Wilhelm von Borries
• ~1850: F. J. D. Schaumburg

Literatur

• Claus Dammann: Das alte Gericht Delm und die dortigen früheren wirtschaftlichen Verhältnisse. Als Heft 9 der Stader Heimatbücher, Krause, Stade 1926
• Carsten Kreuder: Die bäuerlichen Verhältnisse im Gericht Delm 1500 bis 1648. 1969