Postmoor

Wapen/Flagg	Koort
Basisdaten
Bundsland: Neddersassen Landkreis: Stood Samtgemeen: Hornborg Gemeen: Bliersdörp
Inwahners:
Postleettall:	21640
Vörwahl:	04163
Geograafsche Laag:	53° 30′ N, 9° 35′ O

Postmoor (hoochdüütsch Postmoor) is en Dörp in de Gemeen Bliersdörp, Samtgemeen Hornborg, in’n Landkreis Stood, Neddersassen.

Geografie

In’n Noordwesten von dat Dörp löppt in so bi 500 Meter Afstand de Au langs.

De Naveröörd sünd Hornborg in’n Noorden, Loodkup in’n Noordoosten, Dammhusen in’n Oosten, Neeklooster, Heendörp un Nottensdörp in’n Süüdoosten, Grundolendörp in’n Süden, Bliersdörp in’n Süüdwesten un Good Daudiek in’n Westen.

Historie

Postmoor is 1795 as Moorkolonie grünnt worrn. De Naam kummt von de Plant Post, de hier in’t Moor wassen deit.

Vör 1852 hett dat Dörp to dat Gericht Delm höört un weer denn von 1852 bet 1859 in dat Amt Hornborg. Denn is dat Deel von dat Amt Harsfeld worrn. Na 1885 hett dat denn to’n Kreis Stood höört un von 1932 af an to’n hüdigen Landkreis Stood. De Oort hett al von öllers her to Bliersdörp totellt.

Von 1910 bet to’n Tweten Weltkrieg hett dat en Looshuus von de Goodtemplers in Postmoor geven. De Hambörger Koopmann, de lang in Postmoor leevt hett, hett dat stift hatt. Na’n Krieg hett sik de Loos nich wedder tohoopfunnen un dat Huus is denn an de Gemeen Bliersdörp överdragen un verköfft worrn.

Inwahnertall

Johr	Inwahners
1824-00-001824	1 Füürsteed
1871-12-011. Dezember 1871	95 Lüüd, 12 Hüüs
1981-00-001981	247

Religion

Postmoor is evangeelsch-luthersch präägt un höört to dat Kaspel von de Katharinen-Kark in Bliersdörp.

Weertschop un Infrastruktur

In’n Oosten von Postmoor gifft dat en grote Sandkuhl, in de Sand ünner annern för den Bo von de Autobahn 26 afboot warrt.

Fleten Water hett Postmoor 1961 kregen.

Verkehr

Postmoor liggt an de Kreisstraat 37, de in’n Süüdwesten na Bliersdörp un Rutenbeek löppt un dor över de K 26 na Harsfeld geiht. In’n Noordoosten münnt de K 37 dicht bi Postmoor in de Bundsstraat 73, de denn in’n Noordwesten na Hornborg rin un över Dullern un Gothenborg na Stood löppt. In’n Süüdoosten löppt de B 73 över Heendörp un Neeklooster na Buxthu. Nich wied von Postmoor weg gaht von de B 73 denn noch wedder de Landsstraat 130 na Nottensdörp af un de K 36, de denn över de Opfohrt 5 Hornborg an de Autobahn 26 (Afsnidd Stood–Hamborg) anslaten is, de so bi twee Kilometer von Postmoor weg is.

De nächste Bahnhoff is in Hornborg an de Nedderelvbahn, wat so 1,5 Kilometer weg is.

Weblenken

• Websteed över de Geschicht von Postmoor (hoochdüütsch)