Good Wiegersen

Vun Wikipedia
Wesseln na: Navigatschoon, Söök
Door to dat Good an de Wiegerser Straat
Toorn an de Eck Wiegerser Straat/Schoosterstraat
Toorn an de Straat Na’n Viddelsbarg

Dat Good Wiegersen (hoochdüütsch Gut Wiegersen) is en ehmalig Eddelgood in dat Dörp Wiegersen (Gemeen Sounsiek, Samtgemeen Obbens, in’n Landkreis Stood, Neddersassen).

De Herr op Wiegersen weer ok Gerichtsherr in dat Gericht op’n Delm un in dat Gericht Jeem.

Historie[ännern | Bornkood ännern]

Dat Good Wiegersen hett sik in dat 17. Johrhunnert ut en Meierhoff billt. Melchior von der Lieth von Good Neer-Ochenhusen hett 1627 den Meierhoff von Hans Mertens övernahmen un em to en Eddelgood utboot. 1636/1637 weer de Meierhoff ut de Höövlist verswunnen, wo sik ut sluten lett, dat de Hoff to de Tied denn as Eddelgood gullen hett.

Na Melchior sien Dood 1674 güng dat Good an sien Söhn Christoff Hermann Sebastian von der Lieth. Nadem Christoff krank worrn weer, hebbt siene beiden Bröder, Johann Eberhard un Franz Julius von der Lieth dat Good föhrt. Na Christoff sien Dood güng dat Good an sien Brodersöhn Otto Jürgen von der Lieth. Otto sien eenzigen Söhn is al in en Öller von 16 Johr doodbleven. Dorüm güng dat Good na Otto sien Dood an siene Süster Magdalene von der Lieth. Magdalene weer verheiraadt mit Diedrich Gebhard von Horn, de dat Good von de Arvengemeenschop von der Lieth köfft hett. As Diedrich Gebhard doodbleven is, hett sien Söhn Claus Hinrich von Horn dat Good arvt. De weer bet 1782 Goodsherr op Wiegersen. In düsse Tied hett aver siene Süster Anna Sophie (verheiraadt mit Major von Grotthaus) op dat Good leevt. Claus Hinrich hett de Verwaltung övernahmen, bewirtschaft worrn is dat Good siet 1769 aver von en Pächter.

Na’n Dood von Claus Hinrich hett sien Swegersöhn Diederich Christian Arnold von Zesterfleth dat Good Wiegersen övernahmen. De weer Richter in Celle un hett dorüm de Verwaltung von dat Good nich sülvs övernahmen. Dat hett de Greev Paul Steffen ut Obbens daan. Dat Goodshuus weer an Leutnant von Gustedt vermeedt, dat Land is wieder von Pächter Nicolas Ratjens bewirtschaft worrn. Nadem de 1791 doodbleven is, hett Christian Arnold eerst twee Johr later Claus Hinrich Ratjens, den Söhn von Nicolas Ratjens, as ne’en Pächter nahmen. 1818 hett Christian Arnold sien Söhn Heinrich Christian Arnold von Zesterfleth dat Good Wiegersen övernahmen. Ünner de von Zesterfleth hett dat Good jümmer mehr Schullen maakt bet dat twüschen 1826 un 1836 kort vör’n Konkurs stünn. Von Zesterfleth hett dat Good 1836 an sien Swegersöhn Eduard von Kielmansegg övergeven, de de Schullen denn afboot hett. Ünner em is ok dat ne’e Herrnhuus boot worrn, in dat ünner annern 1861 de hannöversche König Georg V. op siene Reis na de Karkwieh von de Marien- un Bartholomäus-Kark in Harsfeld de Nacht tobröcht hett.

1862 hett Graaf Adolf Georg Börries von Grote dat Good köfft, dat he 1887 wedder an Franz von Lipperheide verköfft hett. De füng dor mit de Forstweertschop an, de ok vondaag noch bedreven warrt. Dor hett he de Ackers un de Heid in Borrel för opforsten laten, wat dorto föhrt hett, dat de Inwahners bet 1900 jemehr Dörp all verlaten harrn. Franz von Lipperheide hett 1890 ok de Müür üm dat Good in Opdrag geven, de dat Oortsbild von Wiegersen bet vondaag präägt. Dat Kielmanseggsche Herrnhuus hett he afrieten laten un denn en Jagdslott ut Holt boot. Franz von Lipperheide is 1906 doodbleven. Nadem 1932 ok siene Weetfro doodbleven is, hett 1932 de Neffe Ludger Sulzer dat Good arvt. De hett 1953 an de Steed von dat hölten Jagdslott 1953 en modeern Landhuus boot.

Vondaag warrt dat fröhere Eddelgood as Forstgood bruukt. In dat Herrnhuus is en Yoga-Zentrum in. En Deel von de fröheren Weertschopsgebüüd, sowied de nich för de Forstweertschop bruukt warrt, warrt as Wahnhüüs bruukt. De Backsteenmüür üm dat Good is 2003 wedder nee maakt worrn.

Verwaltungsgeschicht[ännern | Bornkood ännern]

Vör 1852 hett dat Good to dat Gericht Delm höört un weer denn von 1852 bet 1859 in dat Amt Hornborg. Denn is dat Deel von dat Amt Harsfeld worrn. Na 1885 hett dat denn to’n Kreis Stood höört un von 1932 af an to’n hüdigen Landkreis Stood.

Dat Good höört von öllers bi Wiegersen mit bi, weer över längere Tied aver nich Deel von de polietsche Gemeen Wiegersen. As Riddergood weer dat exemt. Later is dat denn aver doch Deel von de Gemeen Wiegersen worrn. De Gemeen Wiegersen is an’n 1. Juli 1972 mit de Gemeenreform in Neddersassen Deel von de Gemeen Sounsiek worrn.

Goodsherrn[ännern | Bornkood ännern]

Inwahnertall[ännern | Bornkood ännern]

Johr Inwahners
1848-00-00 1848[1] 23 Lüüd. 3 Hüüs

Religion[ännern | Bornkood ännern]

Dat Good Wiegersen is evangeelsch-luthersch präägt un höört to dat Kaspel von de Kark in Obbens.

Literatur[ännern | Bornkood ännern]

  • Harm Prior: Rittergut und Meierhöfe auf der Stader Geest. Wiegersen im 17. und 18. Jahrhundert (= Einzelschriften des Stader Geschichts- und Heimatvereins. 32, ISSN 0585-0037). Verlag von’n Stoder Geschichts- un Heimatvereen, Stood 1995

Footnoten[ännern | Bornkood ännern]

  1. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149

Weblenken[ännern | Bornkood ännern]

Commons-logo.svg Good Wiegersen. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:53° 23′ N, 9° 33′ O