Reindörp

Vun Wikipedia
Wapen/Flagg Koort

Wapen vun Reindörp

Reindörp
Laag vun Reindörp in Düütschland
Basisdaten
Bundsland: Neddersassen
Landkreis: Horborg
Gemeen: Bookholt
Inwahners:
Postleettall: 21244
Vörwahl: 04181
Geograafsche Laag:
Koordinaten:53° 19′ N, 9° 54′ O
53° 19′ N, 9° 54′ O

Karte

Reindörp (hoochdüütsch Reindorf) is en Dörp in de Gemeen Bookholt in’n Landkreis Horborg, Neddersassen.

Geografie[ännern | Bornkood ännern]

Reindörp liggt an’n Reindörper Beek, de en Stück in’n Süüdwesten in’n Seppenser Beek münnt.

De Naveröörd sünd Büüns in’n Noorden, Eekstüüv un Itzenbüttel in’n Noordoosten, Oosterbarg un Jesborg in’n Oosten, Lüll un Thälsdörp in’n Süden, Holm-Seppens un Seppens in’n Süüdwesten, Suurhoop in’n Westen un Bookholt in’n Noordwesten.

Historie[ännern | Bornkood ännern]

Reindörp kummt an’n 25. Juli 1430 toeerst in de Oorkunnen vör.

Dat Gasthuus Brunkhorst is in de Tied üm 1880 inricht worrn. Nadem bi en Grootbrand 1899 dree Hööv mit dat Gasthuus afbrennt sünd, is dat Gasthuus nee opboot worrn. In de Tied üm 2000 müss dat Gasthuus dichtmaken un is denn 2014 afreten worrn.[1]

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Jesborg in’n Kanton Hittfeld höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Vaagdie Hittfeld in dat Amt Horborg tohöört un denn von 1852 bet 1859 to dat Amt Hittfeld. 1859 is dat wedder Deel von dat Amt Horborg worrn. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

Reindörp hett fröher polietsch to de Gemeen Itzenbüttel mit tohöört. Mit de Gemeenreform in Neddersassen an’n 1. Juli 1972 is de Oort denn aver von Itzenbüttel aftrennt un Deel von de Gemeen Bookholt worrn. Itzenbüttel un de Reindörper Oortsdeel Oosterbarg sünd Deel von de Gemeen Jesborg worrn.

Vondaag is Reindörp binnen de Gemeen Bookholt en Oortschop mit egen Oortsvörsteiher.

Inwahnertall[ännern | Bornkood ännern]

Johr Inwahners
1793-00-001793[2] 4 Füürsteden
1812-00-001812[3] 40
1824-00-001824[4] 4 Füürsteden
1848-00-001848[5] 58 Lüüd, 8 Hüüs
1871-12-011. Dezember 1871[6] 83 Lüüd, 13 Hüüs

Religion[ännern | Bornkood ännern]

Reindörp is evangeelsch-luthersch präägt un höört to dat Kaspel von de Martins-Kark in Jesborg.

För de Kathoolschen is de St.-Petrus-Kark in Bookholt tostännig.

Wapen[ännern | Bornkood ännern]

Dat Wapen wiest op roden Grund en gollen Lööw, de schriddt, ümgeven von twee sülvern Krinks.

Oortsvörsteihers[ännern | Bornkood ännern]

  • opstunns: Heike Meyer

Weertschop un Infrastruktur[ännern | Bornkood ännern]

De freewillige Füürwehr Bookholt is för Reindörp mit tostännig.

Verkehr[ännern | Bornkood ännern]

Dör Reindörp löppt de Kreisstraat 83, de in’n Süüdoosten na Lüll un Jesborg geiht un in’n Noordwesten na Bookholt. Över Itzenbüttel löppt ok en lüttjere Straat na Jesborg.

De nächste Autobahn is de Autobahn 1. De Opfohrt 42 Dibbersen liggt so acht Kilometer in’n Noordwesten von Reindörp.

De nächste Bahnhoff is so bi twee Kilometer wied weg in’n Noordwesten de Bahnhoff Bookholt an de Bahnlien Hamborg–Bremen un an de Heidbahn.

Reindörp liggt ok an de fröhere Bahnlien Wittenbarg–Bookholt, de 1874 anleggt worrn is. De Oort harr aver toeerst keen egen Bahnhoff. Eerst na’n Tweten Weltkrieg hett dat Dörp en Bahnhoff kregen. De hett bet 1981 bestahn, as de Personenverkehr op de Bahnlien instellt worrn is. Sietdem warrt de Gleise blots noch as Deel von de Göderümgehungsbahn Hamborg bruukt.

Kort bevör de Briten de Gegend innahmen hebbt, hebbt 1945 an’t Enn von’n Tweten Weltkrieg düütsche Truppen de Iesenbahnbrügg bi Reindörp sprengt.

Literatur[ännern | Bornkood ännern]

  • Hans-Heinrich Wolfes: Itzenbüttel - Osterberg - Reindorf. Dorfgeschichte. Jesbörger Arbeidskreis för Heimatpleeg e.V., Karisma, Bookholt 2005, ISBN 3-938497-70-X

Footnoten[ännern | Bornkood ännern]

  1. Reindorf verändert sein Gesicht, Wochenblatt an’n 28. Januar 2014
  2. Christoph B. Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. 1791, Sied 189: https://books.google.de/books?id=jN5QAAAAcAAJ&pg=PA189
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 60: http://books.google.de/books?id=Q 5OAAAAcAAJ&pg=PA60
  4. C. H. Jansen: Statistisches Handbuch des Königreichs Hannover. 1824, Sied 502: http://books.google.de/books?id=tG0AAAAAcAAJ&pg=PA502
  5. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 92: http://books.google.de/books?id=eOI-AAAAcAAJ&pg=PA92
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 129: https://books.google.de/books?id=qTZDAQAAMAAJ&pg=RA2-PA129