Mairie Garlstörp
De Mairie Garlstörp weer in de Franzosentied (1810 bet 1813) een von de dree Mairien, in de de Kanton Garlstörp indeelt weer. De Seet weer in Garlstörp. Se harr 3491 Inwahners.[1]
Historie
[ännern | Bornkood ännern]De Ümgegend von Garlstörp hett vör de Franzosentied to de Vaagdie Parrns un de Amtsvaagdie Garlstörp von dat Amt Winsen in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Garlstörp een von de 13 Mairien in’n Kanton Garlstörp von’n Distrikt Horborg, Departement von de Nedderelv.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Garlstörp weer nu een von de dree Mairien in’n Kanton Garlstörp, Distrikt Lümborg, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de negen Mairien Garlstörp, Marxen, Braackel, Diekshuus, Äästörp, Sohrndörp, Holm, Wulfsen un Luhmöhlen (all negen in’n Kanton Mesborg) höört harrn. De Mairie Braackel is nich kumplett an de Mairie Garlstörp gahn: de Oort Tangendörp is in de Mairie Parrns wesselt. Von de Mairie Luhmöhlen sünd blots de Öörd Lübberstää un Eyendörp an de Mairie Garlstörp gahn. De Rest keem an de Mairie Karkgellsen. Ut de Mairie Wulfsen is blots de Oort Gastää an de Mairie Garlstörp gahn un de Rest an de Mairie Parrns.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
[ännern | Bornkood ännern]Dor hebbt düsse Öörd tohöört:
- Kaiserriek Frankriek:[1]
- Garlstörp (257 Inwahners), Gö’nstörp (159), Oilstörp (94), Marxen, Smafelln (181), Asendörp (141), Braackel (166), Quarrendörp (148), Diekshuus (37), Hanstää, Ollsen (312), Niendörp (182), Schätzendörp (104), Toppenstää (277), Lübberstää (186), Äästörp (216), Sohrndörp, Su’möhlen (172), Weih, Schierhoorn (84), Holm (128), Gastää (182), Solzhusen, Loobk, We’ermööd (345), Eyendörp (120)
Vondaag sünd düsse Öörd Deel von de Samtgemenen Solzhusen un Hanstää un de Gemeen Bookholt.
Footnoten
[ännern | Bornkood ännern]- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 58
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 40