Mairie Karkgellsen

De Mairie Karkgellsen weer in de Franzosentied (1810 bet 1813) een von de dree Mairien, in de de Kanton Garlstörp indeelt weer. De Seet weer in Karkgellsen. Se harr 1743 Inwahners.^[1]

Historie[ännern | Bornkood ännern]

De Ümgegend von Karkgellsen hett vör de Franzosentied to de Amtsvaagdien Amelkusen un Garlstörp von dat Amt Winsen, de Huusvaagdie von dat Amt Lüün un to dat Gericht von dat Klooster St. Michaelis in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Karkgellsen een von de 18 Mairien in’n Kanton Bienbüddel von’n Distrikt Lümborg, Departement von de Nedderelv.^[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Karkgellsen weer nu een von de dree Mairien in’n Kanton Garlstörp, Distrikt Lümborg, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to söss Mairien höört harrn: de Mairien Karkgellsen, Heinsen, Örzen un Rettmer ut’n Kanton Bienbüddel, de Mairie Mechtsen ut’n Kanton Bewick un de Mairie Luhmöhlen ut’n Kanton Garlstörp. Von de Mairie Luhmöhlen is allens utbenahmen de Öörd Lübberstää un Eyendörp an de Mairie Karkgellsen gahn. De Rest keem an de Mairie Garlstörp. Von de Mairie Mechtsen is allens utbenahmen Mechtsen sülvs an de Mairie Karkgellsen gahn un Mechtsen an de Mairie Bewick.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.