Luhmöhlen

Vun Wikipedia
Zur Navigation springen Zur Suche springen
Wapen/Flagg Koort

Wapen vun Luhmöhlen

Luhmöhlen
Laag vun Luhmöhlen in Düütschland
Basisdaten
Bundsland: Neddersassen
Landkreis: Horborg
Samtgemeen: Solzhusen
Gemeen: Solzhusen
Inwahners: 493 (2013-06-3030. Juni 2013)
Postleettall: 21376
Vörwahl: 04172
Geograafsche Laag:
Koordinaten:53° 13′ N, 10° 12′ O
53° 13′ N, 10° 12′ O

Luhmöhlen (hoochdüütsch Luhmühlen) is en Dörp in de Gemeen Solzhusen (Samtgemeen Solzhusen) in’n Landkreis Horborg, Neddersassen.

Geografie[ännern | Bornkood ännern]

De Oort liggt in de Lümbörger Heid an dat linke Över von de Luh. In’n Süden von Luhmöhlen münnt de Noordbeek in de Luh.

De Naveröörd sünd Sneed un Loobk in’n Noorden, Veerhöben un Westergellsen in’n Noordoosten, Karkgellsen un Sugellsen in’n Oosten, Röndahl un Wetzen in’n Süüdoosten, Puunsen in’n Süden, Eyndörp in’n Süüdwesten un Solzhusen, Oilstörp un Gastää in’n Noordwesten.

Historie[ännern | Bornkood ännern]

Waterrad von de ole Watermöhl in Luhmöhlen

Dat Dörp Luhmöhlen geiht trügg op de Watermöhl an de Luh, de in dat 12. Johrhunnert toeerst in de Oorkunnen vörkummt. De Möhl weer in Besitt von de Greven von Wölpe. Later hett Iso von Wölpe de Möhl an dat Bisdom Veern vermaakt. Bet 1764 bestünn de Oort blots ut de Watermöhl. In dat Johr hett Georg III., Kurförst von Bruunswiek-Lümborg, genehmigt, dat in Luhmöhlen op 160 hannöversche Morgen Land Veteranen ut’n Sövenjohrigen Krieg ansiedelt warrt. Dat weren acht Siedlersteden, de op Arventins utgeven worrn sünd.

In’n Eersten Weltkrieg sünd twee Soldaten ut Luhmöhlen fullen oder vermisst un in’n Tweten Weltkrieg 13.[1]

Verwaltungsgeschicht[ännern | Bornkood ännern]

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Luhmöhlen in’n Kanton Garlstörp höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Karkgellsen in’n Kanton Garlstörp.

De Oort hett vör 1885 to de Amtsvaagdie Garlstörp in dat Amt Winsen tohöört. Blots in de Johren 1852 bet 1859 hett de Oort för en Tied to dat Amt Solzhusen höört. Na 1885 weer dat in’n Kreis Winsen un 1932 is dat Deel von’n Kreis Horborg worrn.

De Oort weer fröher en egenstännige Gemeen, de an’n 1. Juli 1972 mit de Gemeenreform in Neddersassen Deel von de Gemeen Solzhusen worrn is.

Inwahnertall[ännern | Bornkood ännern]

Johr Inwahners
1791-00-001791[2] 8 Füürsteden
1812-00-001812[3] 80
1824-00-001824[4] 9 Füürsteden
1848-00-001848[5] 93 Lüüd. 13 Hüüs
1871-12-011. Dezember 1871[6] 117 Lüüd. 17 Hüüs
1885-12-011. Dezember 1885[7] 100 Lüüd. 18 Hüüs
1905-12-011. Dezember 1905[8] 113 Lüüd. 20 Hüüs
1910-12-011. Dezember 1910[9] 108
1925-00-001925[10] 145
1933-00-001933[10] 124
1939-00-001939[10] 122

Religion[ännern | Bornkood ännern]

Luhmöhlen is evangeelsch-luthersch präägt un höört to dat Kaspel von de Johannis-Kark in Solzhusen.

För de Kathoolschen is de St.-Maria-Kark in Äästörp tostännig, de siet 1. November 2014 to de Karkengemeen St. Petrus in Bookholt tohöört.

Wapen[ännern | Bornkood ännern]

Dat Wapen von Luhmöhlen wiest op sülvern Grund en blau Wellenband. Baven is en swarten Rappen to sehn un ünnen en swart Möhlenrad.

Möhlenrad un Wellenband staht för de Watermöhl un de Luh. De Rapp steiht as Symbool för de Deckstatschoon.

Kultur[ännern | Bornkood ännern]

Kriegerdenkmaal in Luhmöhlen
Riederdörp Luhmöhlen

In Luhmöhlen steiht en Denkmaal för de Fullenen ut de twee Weltkrieg’.

De wichtigste Vereen för den Oort is de Peertucht- un Riedvereen Luhmöhlen von 1923, de ünner annern dat internatschonale Turnier CCI Luhmöhlen utricht. Dorüm warrt de Oort ok „Riederdörp“ Luhmöhlen nöömt.

Op dat Turniergelänn bi Luhmöhlen (dat Rebeed höört al to Westergellsen) gifft dat siet 2015 ok elk Johr dat Musikfestival A Summer’s Tale.

Weertschop un Infrastruktur[ännern | Bornkood ännern]

För Luhmöhlen is de freewillige Füürwehr Solzhusen mit tostännig.

Verkehr[ännern | Bornkood ännern]

Dör Luhmöhlen löppt de Landsstraat 216, de in’n Westen över Solzhusen, Oilstörp, Gö’nstörp un Garlstörp na Niendörp geiht un in’n Oosten över Westergellsen, Karkgellsen un Reppenstää na Lümborg. De L 216 drippt sik in Solzhusen mit de L 234, de in’n Noorden över Gastää na Luhdörp un Winsen föhrt un in’n Süden över Puunsen un Olndörp na Amelkusen un Wriel.

De nächste Autobahn is de Autobahn 7 (Afsnidd HamborgHannover). De Opfohrten 40 Garlstörp (an de L 216) un 41 Äästörp (an de K 5) doot all beid so negen Kilometer in’n Westen von Luhmöhlen liggen.

De nächste Bahnhoff is so bi 15 Kilometer wied weg in’n Noordoosten de Bahnhoff Radbrouk an de Bahnlien Hamborg–Hannover. Von 1906 bet 1970 hett dat ok Personenverkehr op de Bahnlien Winsen–Hützel geven. De Bahnhoff Solzhusen leeg in düsse Tied dree Kilometer in’n Noordwesten.

Lüüd[ännern | Bornkood ännern]

Uwe un Petra Nettelbeck hebbt Stücker wat Johren in Luhmöhlen leevt. Ok dat Ehpoor Carlheinz Hollmann un Gerti Daub hett in Luhmöhlen leevt.

Literatur[ännern | Bornkood ännern]

  • Friedrich Wilhelm Reineke: Salzhausen – Luhmühlen · Oelstorf · Putensen – Heimat am Rande der Heide. Solzhusen 1990

Footnoten[ännern | Bornkood ännern]

  1. Onlineprojekt Gefallenendenkmäler
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 147
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 58
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 390
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 104
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 134
  7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 140
  8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 184
  9. Inwahnertallen op gemeindeverzeichnis.de
  10. a b c Inwahnertallen op verwaltungsgeschichte.de

Weblenken[ännern | Bornkood ännern]

Commons-logo.svg Luhmöhlen. Mehr Biller, Videos oder Audiodateien to’t Thema gifft dat bi Wikimedia Commons.