Tangendörp

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Solzhusen Gemeen: Toppenstää
Flach:	9,35 km²
Inwahners:	825 (2011-12-3131. Dezember 2011)
Inwahnerdicht:	88,2 Inwahners pro km²
Hööchd:	35 m över de See
Postleettall:	21442
Vörwahl:	04173
Geograafsche Laag:	53° 18′ N, 10° 6′ O

Dörpstraat in Tangendörp

Gasthuus Vossbur in Tangendörp

Tangendörp (hoochdüütsch Tangendorf) is en Dörp in de Gemeen Toppenstää in’n Landkreis Horborg, Neddersassen.

Geografie

Tangendörp liggt in de Lümbörger Heid un dicht bi’t Garlstörper Holt. Twee Kilometer in’n Oosten von dat Dörp flütt de Aubeek langs, de in de Luh münnt.

De Naveröörd sünd Parrns in’n Noordoosten, Wulfsen un Gastää in’n Oosten, Toppenstää in’n Süden, Quarrendörp in’n Süüdwesten, Braackel in’n Westen un Thieshoop in’n Noordwesten.

Historie

Schievenfibel von Tangendörp

In’n Eersten Weltkrieg sünd 18 Soldaten ut Tangendörp fullen oder vermisst un in’n Tweten 34.

1930 is bi Tangendörp in en Graffbarg ut de Bronztied de Schievenfibel von Tangendörp funnen worrn. De Fibel liggt vondaag in dat Archäoloogsche Museum in Hamborg.

Verwaltungsgeschicht

In de Franzosentied von 1810 bet 1814 hett de Oort to de Mairie Parrns in’n Kanton Winsen höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Parrns in dat Amt Winsen tohöört. Blots in de Tied von 1852 bet 1859 weer de Oort kort in dat Amt Parrns. Na 1885 weer Tangendörp in’n Kreis Winsen. 1932 is dat Dörp Deel von’n Kreis Horborg worrn.

An’n 1. Juli 1972 is de Gemeen Tangendörp bi de Gemeenreform in Neddersassen Deel von de Gemeen Toppenstää worrn.

Inwahnertall

Johr	Inwahners
1793-00-001793	18 Füürsteden
1812-00-001812	152
1824-00-001824	20 Füürsteden
1848-00-001848	220 Lüüd, 29 Hüüs
1871-12-011. Dezember 1871	290 Lüüd, 40 Hüüs
1910-12-011. Dezember 1910	324
1925-00-001925	360
1933-00-001933	349
1939-00-001939	414
1976-12-3131. Dezember 1976	594
1999-06-3030. Juni 1999	776
2004-12-3131. Dezember 2004	833
2009-12-3131. Dezember 2009	799
2011-12-3131. Dezember 2011	825

Religion

Tangendörp is evangeelsch-luthersch präägt un höört to dat Kaspel von de Gertrud-Kark in Parrns.

Kultur

En Denkmaal för de Fullenen ut de twee Weltkrieg’ steiht op’n Karkhoff.

Elk Johr gifft dat in Tangendörp dat Buurnreken. Ok Faslam warrt fiert.

Verenen

De Schützenvereen Tangendörp is 1935 grünnt worrn.

Weertschop un Infrastruktur

Tangendörp hett en egene Freewillige Füürwehr, de an’n 18. Juli 1893 grünnt worrn is.

Verkehr

Tangendörp liggt an de Kreisstraat 6, de in’n Süden na Toppenstää an de Landsstraat 212 ran löppt un in’n Noordwesten na Thieshoop un an de L 215 ran. Dor an de L 215 liggt ok de Opfohrt 39 Thieshoop op de Autobahn 7 (Afsnidd Hamborg–Hannover). Ans gifft dat noch en lüttjere Straat na Wulfsen.

De nächsten Bahnhööv sünd de Bahnhoff Ashusen un de Bahnhoff Winsen an de Bahnlien Hamborg–Hannover. Von 1874 bet 1981 hett dat ok Personenverkehr op de Bahnlien Wittenbarg–Bookholt geven. In de eerste Tied weer de nächste Bahnhoff veer Kilometer in’n Oosten in Wulfsen (dor ok Ansluss an de Bahnlien Winsen–Hützel). In dat 20. Johrhunnert hett denn Tangendörp ok en egen Bahnhoff kregen.