Bröckelbeek
| Wapen/Flagg | Koort | |
|---|---|---|
|
|
| |
| Basisdaten | ||
| Inwahners: | ||
| Postleettall: | 21745 | |
| Vörwahl: | 04771 | |
| Geograafsche Laag: | Koordinaten:53° 41′ N, 9° 5′ O53° 41′ N, 9° 5′ O | |
|
| ||
Bröckelbeek (hoochdüütsch Bröckelbeck) is en Dörp in de Gemeen Hemmoor in’n Landkreis Cuxhoben, Neddersassen, dat von öllers bi Westersood mit bihöört hett.
Welk von de Hüüs an’n Westrand von’n Oort höört ok al bi dat Dörp Varrel in de Gemeen Mittelsnohn.
Geografie
[ännern | Bornkood ännern]Dat Dörp liggt an’n Rand von de Geest, an e sik na Noordwesten Moor anslütt. In’n Westen is de Balksee un na Süden to liggt de Westerbarg.
Bröckelbeek liggt an’n Hollbeek, de von’n Westerbarg kummt, un in Bröckelbeek denn ok Möhlenbeek oder Goldbeek heet. De Beek münnt in’n Noordwesten in’n Remperbeek. An’n Westrand von dat Dörp Bröckelbeek hett de Bröckelbeek sien Born. Bröckelbeek un Remperbeek doot denn all beid in’n Balksee münnen.
De Naveröörd sünd Ellerbrook un Wittenmoor in’n Noorden, Dobrook, Hemmoor un Westersood in’n Noordoosten, Warstood un Heeßel in’n Süüdoosten, Varrel in’n Süüdwesten un Süderbusch in’n Noordwesten.
Historie
[ännern | Bornkood ännern]
Dat Dörp weer nienich as Gemeen egenstännig un hett jümmer bi Westersood mit bihöört.
Dat eerste Huus von Bröckelbeek is 1821 boot worrn, na de Meenheitsdelung in Westersood.[1] Över de Johren sünd dat jümmer mehr Hüüs worrn.
De ole Watermöhl an’n Möhlenbeek is 1860 boot worrn.
Verwaltungsgeschicht
[ännern | Bornkood ännern]Dat Dörp weer vör 1859 in de Böörd Loomst von’t Amt Bremervöör, denn von 1859 bet 1885 in dat Amt Oosten un na 1885 in’n Kreis Neehuus. 1932 is dat Deel von’n Kreis Land Hadeln worrn un 1977 denn von’n Landkreis Cuxhoben.
Inwahnertall
[ännern | Bornkood ännern]| Johr | Inwahners |
|---|---|
| 1. Dezember 1871[2] | 54 Lüüd, 13 Hüüs |
Religion
[ännern | Bornkood ännern]
Bröckelbeek is evangeelsch-luthersch präägt un höört to dat Kaspel von de Christus-Kark in Warstood. Bevör de Christus-Kark 1898 boot worrn is, hett de Oort to dat Kaspel von de Bartelmees-Kark in Loomst tohöört.
För de Kathoolschen is de St.-Ansgar-Kark in Warstood tostännig, de siet 2010 Deel von de Karkengemeen Hillig Geist in Stood is.
De Karkhoff Bröckelbeek liggt an’n Süüdrand von dat Dörp an de K 21.
Wapen
[ännern | Bornkood ännern]
Dat Wapen von Bröckelbeek wiest op blauen Grund en rode Windmöhl mit sülvern Flögels. Dat Wapen warrt blots inoffiziell bruukt, is aver ok op en Wapensteen an de Krüzung K 21/K 29 afbillt. Dat Wapen geiht wohrschienlich trügg op de Schüttenfahn von’n Schüttenvereen Bröckelbeek, de 1952 wieht worrn is un dit Wapen op de Vörsied wiest.[3]
Kultur
[ännern | Bornkood ännern]Verenen
[ännern | Bornkood ännern]De Schüttenvereen Bröckelbeek un Ümgegend is 1904 grünnt worrn.
Weertschop un Infrastruktur
[ännern | Bornkood ännern]As Füürwehr is de Freewillige Füürwehr Westersood för Bröckelbeek mit tostännig.
Verkehr
[ännern | Bornkood ännern]Bröckelbeek liggt an de Kreisstraten 21 un 29. De K 29 löppt in’n Noordoosten na Westersood (un över de K 28 na de Bundsstraat 73) un in’n Süüdwesten över Varrel un Nordahn na Mittelsnohn an de Landsstraat 116 ran. De K 21 geiht in’n Noorden na Ellerbrook un in’n Süden na Loomst an de Bundsstraat 495 ran. En lüttjere Straat gifft dat ans noch na Heeßel.
De nächsten Autobahnen sünd de A 26 (Afsnidd Stood–Hamborg) un de A 27 (Afsnidd Cuxhoben–Bremerhoben). De Opfohrt 2 Stood-Süüd op de A 26 liggt so 35 Kilometer in’n Süüdoosten von Bröckelbeek an de B 73, de Opfohrt 1 Cuxhoben op de A 27 35 Kilometer in’n Noordwesten un de Opfohrt 5 Debst 35 Kilometer in’n Westen.
De nächste Bahnhoff is de Bahnhoff Hemmoor an de Nedderelvbahn von Cuxhoben na Hamborg.
Ver- un Entsorgung
[ännern | Bornkood ännern]Dat fleten Water för Bröckelbeek kummt von’n Waterverband Wingst. Dat Afwater warrt in dat Klärwark Hemmoor klärt.
Footnoten
[ännern | Bornkood ännern]- ↑ Westersode gestern und heute. Hemmoor 1983
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 148
- ↑ Westersode gestern und heute. Hemmoor 1983, Sied 273
Weblenken
[ännern | Bornkood ännern]
Basbeek (mit de Möhlenreeg, Sethlerhemm un den Tegelkamp) | Heeßel (mit Wedelsforth, de Pulvermöhl un dat Schuppenfeld) | Hemm | (Oold-)Hemmoor (mit en Deel von Ohrensfluchtermoor) | Westersood (mit Bröckelbeek) | Warstood (mit Swartenhütten)
