Seppenser Möhl

Vun Wikipedia
Zur Navigation springen Zur Suche springen
Seppenser Möhl in de Tied üm 1900

De Seppenser Möhl (hoochdüütsch Seppenser Mühle) is en Watermöhl an’n Seppenser Beek bi Seppens. Dat liggt in de Gemeen Bookholt in’n Landkreis Horborg, Neddersassen. Polietsch höört dat to de Oortschop Holm-Seppens binnen de Gemeen Bookholt.

Geografie[ännern | Bornkood ännern]

De Öörd ümto sünd Reindörp un Oosterbarg in’n Noordoosten, Lüll, Wiedenhoff un Weih in’n Oosten, Thälsdörp in’n Süüdoosten, Holm in’n Süden, Wörm in’n Süüdwesten, Holm-Seppens in’n Westen un Seppens un Bookholt in’n Noordwesten.

Historie[ännern | Bornkood ännern]

1581 kummt de Möhl toeerst in de Oorkunnen vör.[1]

1667 harr de Möhl twee Mahlwarken. Dat weer en Amtsmöhl von dat Amt Horborg. De Möhl harr ünner annern den Möhlendwang över de Öörd Glüsen, Otter, Will, Kamp, Sprötz, Bookholt, Jesborg un Dibbersen.

1722 is de Möhl von’n Pächter Daniel Heins bedreven worrn. 1726 weer al Hans Detlef Heins Pächter. 1735 hett Hans Detlef Heins de Möhl denn in Arventins köfft. 1749 is Hans Detlef doodbleven un sien Söhn Hans Jacob Heins hett de Möhl övernahmen.[1] 1772 weer al Hans Jacob sien Söhn Hans Jochen Besitter von de Möhl, de 1787 ok Pächter von de Butenmöhl in Wilsdörp worrn is. De Familie Heins hett de Möhl noch bet 1864 tohöört. De Familie hett nu vör allen Möhlen in’n Ruum Horborg bedreven un hett de Seppenser Möhl denn an Dorothea Müller verköfft.

Dat hüdige Haupthuus is 1735 boot worrn un de Anbo an de Westensied 1864. In dissen Anbo weer dat Mahlwark. Vör 1864 weer dat Möhlwark in en extra Gebüüd op dat annere Över von’n Beek. Disse ole Möhl is na 1864 aver afreten worrn.

Nadem 1901 de Heidbahn un de Bahnhoff Holm-Seppens in de Neegd von de Möhl anleggt worrn sünd, kemen veel Utflöglers ut dat Hambörger Rebeed in de Heid. Dorüm is bi de Möhl en Gasthuus inricht worrn. Dat Gasthuus besteiht bet vondaag.

Vondaag höört de Möhl jümmer noch de Familie Müller to. Siet de Johren 1990 steiht de Möhl aver leddig un verfallt bilütten. Toletzt is dor blots noch Bueree dreven worrn un de Möhl is nich mehr lopen. Dat Gebüüd is as Bodenkmaal schuult, daan warrt dor ut Köstengrünn aver nix an.

Verwaltungsgeschicht[ännern | Bornkood ännern]

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

De Oort hett jümmer to de Gemeen Seppens tohöört. An’n 1. Juli 1972 is Seppens mit de Gemeenreform in Neddersassen Deel von de Gemeen Bookholt worrn.

Inwahnertall[ännern | Bornkood ännern]

Johr Inwahners
1848-00-001848[2] 28 Lüüd. 3 Hüüs
1871-12-011. Dezember 1871[3] 10 Lüüd. 3 Hüüs

Religion[ännern | Bornkood ännern]

De Seppenser Möhl is evangeelsch-luthersch präägt un höört to dat Kaspel von de Martins-Kark in Jesborg.

För de Kathoolschen is de St.-Petrus-Kark in Bookholt tostännig.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

Von de Seppenser Möhl gaht Straten na Thälsdörp, na Lüll an de K 67, na Seppens an de K 28 un na Holm-Seppens an de K 28/K 72.

De nächste Autobahn is de Autobahn 1. De Opfohrt 42 Dibbersen liggt so teihn Kilometer in’n Noorden von de Seppenser Möhl. De Opfohrt 39 Thieshoop op de A 7 liggt so veerteihn Kilometer in’n Oosten.

De nächste Bahnhoff is so annerthalv Kilometer wied weg in’n Westen de Bahnhoff Holm-Seppens an de Heidbahn.

Footnoten[ännern | Bornkood ännern]

  1. a b Bernd Adam: Zimmerleute, Holzschmuggler, Viehhändler und Branntweinbrenner. Der vielfältige Broterwerb der Seppenser Wassermüller im 18. und 19. Jahrhundert.
  2. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 93: http://books.google.de/books?id=eOI-AAAAcAAJ&pg=PA93
  3. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 132: https://books.google.de/books?id=qTZDAQAAMAAJ&pg=RA2-PA132

Weblenken[ännern | Bornkood ännern]


Koordinaten:53° 17′ N, 9° 53′ O