Mairie Leendaal
De Mairie Leendaal weer in de Franzosentied (1810 bet 1813) een von de dree Mairien, in de de Kanton Leendaal indeelt weer. De Seet weer in Leendaal. Se harr 2281 Inwahners.[1]
Historie[ännern | Bornkood ännern]
De Ümgegend von Leendaal hett vör de Franzosentied to dat Amt Leendaal in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Leendaal een von de twölv Mairien in’n Kanton Leendaal von’n Distrikt Bremervöör, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Leendaal weer nu een von de dree Mairien in’n Kanton Leendaal, Distrikt Bremen, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de fiev Mairien Leendaal, Truup, Falkenbarg, Worphusen un Törfmoor (all in’n Kanton Leendaal) höört harrn. Von de Mairie Worphusen is blots de Oort Worphusen an de Mairie Leendaal kamen. De Rest güng an de Mairie St. Jürgen. Von de Mairie Törfmoor weer dat blots de Oort Lüttmoor. Törfmoor sülvs is ok an de Mairie St. Jürgen fullen. Tosätzlich sünd dor Rebeden tokamen, de vörher to dat Gericht Borgfeld von de Stadt Bremen höört hebbt.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover un de Stadt Bremen sünd denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd[ännern | Bornkood ännern]
Dor hebbt düsse Öörd tohöört:
- Kaiserriek Frankriek:[1]
- Leendaal (438 Inwahners), Höög (16), Butendiek (83), Feldhusen (55), Truup (206), Truperdiek (53), Moorhusen (216), Möhlendiek (80), Gehrden (7), Falkenbarg (117), Heidbarg (129), Trupermoor (171), Nee- un Ooldkloostermoor (114), Warf (52), Timmersloh (90), Veermoor (19), Worphusen (92), Seebargen (166), Lüttmoor (132), Lüningsee (45)
Vondaag sünd düsse Öörd Deel von de Gemeen Leendaal.
Footnoten[ännern | Bornkood ännern]
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 96
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 12