Mairie Hittfeld

De Mairie Hittfeld weer in de Franzosentied (1810 bet 1813) een von de dree Mairien, in de de Kanton Hittfeld indeelt weer. De Seet weer in Hittfeld. Se harr 2662 Inwahners.

Historie

De Ümgegend von Hittfeld hett vör de Franzosentied to de Vaagdien Hittfeld un Höpen von dat Amt Horborg in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Hittfeld een von de 13 Mairien in’n Kanton Hittfeld von’n Distrikt Horborg, Departement von de Nedderelv. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Hittfeld weer nu een von de dree Mairien in’n Kanton Hittfeld, Distrikt Lümborg, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to acht Mairien höört harrn: de Mairien Hittfeld, Jehrden, Ehstörp, Lindhost, Groot Klecken, Leversen un Ninndörp ut’n Kanton Hittfeld un de Mairie Dibbersen ut’n Kanton Töst. Von de Mairie Dibbersen sünd blots Dibbersen un Dangersen an de Mairie Hittfeld gahn. De Rest keem an de Mairie Jesborg.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Hittfeld

• Kaiserriek Frankriek:

  Hittfeld (390 Inwahners), Jehrden (50), Emmelndörp (100), Karoxbossel (33), Eddels (82), Tötsen (82), Jiddens, Hinteln (80), Westerhoff (48), Ehstörp (105), Alvsen (40), Vohrndörp (132), Appelbüttel (20), Sottörp (81), Lüra (23), Lindhost, Plumöhlen (189), Helmstörp (115), Groot Klecken (132), Lütt Klecken (147), Leversen (71), Sieversen (50), Langenrehm, Rosengoorn (58), Emsen (115), Ninndörp (185), Eekel, Eekstüüv (184), Dibbersen (121), Dangersen (29)

Vondaag sünd düsse Öörd Deel von de neddersassischen Gemenen Seevdaal, Rosengoorn un Bookholt. En lütten Deel höört vondaag ok to de Stadt Hamborg.