Wörp
| Wörp | |
|---|---|
| Laag | Neddersassen |
| Stroomsystem | Werser |
| Läng | 29,3 km |
| Afströömrebeed | 135,8 km² |
| Born | bi Steenfeld |
| Münn | bi Truup in de Wümm |
| Water je Sekunn | 1,38 m³/s |
| linke Blangenströöm | Bülster Möhlenbeek, Wilstermoorer Schippgraven |
| rechte Blangenströöm | Schaapsgraven, Tüschendörp-Worphuser Graven |
 | |
De Wörp is en 29,3 Kilometer langen lütten Stroom, de in de Wümm münnt. De Tiden reckt bet na Grasbarg.
De Born von de Wörp liggt an’n Noordrand von Steenfeld in de Neegd von dat Hemelsmoor. Von dor flütt se toeerst en Stück na Noorden, böögt denn na Westen af un denn bi Karktimk un Westertimk op Süüdwesten. Op dat linke Över doot dor Bülst un Wilst liggen un op dat rechte Tarmst. Bi Bülst münnt von links de Bülster Möhlenbeek in de Wörp. Bi Wilst hett de Wörp fröher de Wilster Möhl andreven.
Na Tarmst kummt de Wörp in dat Düvelsmoor. Langs den Stroom doot nu op dat rechte Över de Moordörper Tüschendorp, Tarmstermoor, Seehusen un Wörpdörp liggen un op dat linke Över Wilstermoor, Eekdorp un Huxfeld. Bi Wilstermoor münnt von rechts de Schaapsgraven un von links de Wilstermoorer Schippgraven in de Wörp. De Wörp flütt denn dör Grasbarg un na Grasbarg an dat Moordörp Worphusen langs. Bi Worphusen nimmt de Wörp den Tüschendörp-Worphuser Graven op.
De Stroom kummt denn na Falkenbarg un Leendaal, de op dat rechte Över liggen doot. Op dat linke Över doot dor de lütten Bremer Öörd Verenmoor, Timmersloh, Butendiek un Warf liggen. Op dat linke Över an de Münn von de Wörp in de Wümm liggt Truup un Truperdiek.
Dat Water in de Wümm flütt denn wieder över Leessem un Werser in de Noordsee.
Fröher maal is de Wörp dör de Truper Blänken flaten un bi’n Hoff Gehrden in de Wümm münnt. In dat 18. Johrhunnert is de Loop aver so ümleggt worrn, as he vondaag is. In de Tied von 1826 bet 1864 is de Stroom utboot worrn, dat he överall för Törfkahns good to befohren is.
Weblenken[ännern | Bornkood ännern]
Koordinaten:53° 8′ N, 8° 54′ O