Seehusen (Grasbarg)

Vun Wikipedia
Zur Navigation springen Zur Suche springen
Wapen/Flagg Koort

Wapen vun Seehusen

Seehusen
Laag vun Seehusen in Düütschland
Basisdaten
Bundsland: Neddersassen
Landkreis: Oosterholt
Gemeen: Grasbarg
Inwahners:
Postleettall: 28879
Vörwahl: 04208
Geograafsche Laag:
Koordinaten:53° 12′ N, 8° 60′ O
53° 12′ N, 8° 60′ O

Seehusen (hoochdüütsch Seehausen) is en Dörp in de Gemeen Grasbarg in’n Landkreis Oosterholt, Neddersassen.

Geografie[ännern | Bornkood ännern]

De Oort liggt in dat Düvelsmoor. Dat Water ut dat Rebeed warrt över Gravens na de Wörp hen afföhrt.

De Naveröörd sünd Nee-Ottersteen un Ottersteen in’n Noorden, Tüschendorp in’n Noordoosten, Tarmstermoor in’n Oosten, Wörpdörp in’n Süden, Moorenn in’n Westen un Nee-Mooringen in’n Noordwesten.

Historie[ännern | Bornkood ännern]

Seehusen is 1790 as 2,5 Kilometer lang Stratendörp un findörpsche Moorkolonie in dat Düvelsmoor grünnt worrn. De Naam kummt von en Moorsee, de fröher in dat Rebeed legen hett, bevör dat Moor dröögleggt worrn is.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Worpsweed in’n Kanton Leendaal höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Moorvaagdie Huttenbusch in dat Amt Otterbarg tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.

De Oort is an’n 1. März 1974 mit de Gemeenreform in Neddersassen Deel von de Gemeen Grasbarg worrn.

Inwahnertall[ännern | Bornkood ännern]

Johr Inwahners
1812-00-001812[1] 122
1824-00-001824[2] 22 Füürsteden
1848-00-001848[3] 237 Lüüd. 27 Hüüs
1871-12-011. Dezember 1871[4] 251 Lüüd. 33 Hüüs
1885-12-011. Dezember 1885[5] 260 Lüüd. 37 Hüüs
1905-12-011. Dezember 1905[6] 219 Lüüd. 38 Hüüs
1910-12-011. Dezember 1910[7] 249
1925-00-001925[8] 210
1933-00-001933[8] 205
1939-00-001939[8] 186

Religion[ännern | Bornkood ännern]

Seehusen is evangeelsch-luthersch präägt un höört to dat Kaspel von de Findörp-Kark in Grasbarg.

För de Kathoolschen is de Goden-Hirt-Kark in Leendaal tostännig, de siet 1. September 2012 to de Karkengemeen von de Hillige-Familie-Kark in Oosterholt-Scharmbeek höört. De Goden-Hirt-Kark is 1961 boot worrn.

Wapen[ännern | Bornkood ännern]

Dat Wapen von dat Dörp wiest op grönen Grund över en blauen Schildfoot, de dör en Wellenlien na baven afslaten is, en rood Neddersassenhuus mit gollen Dack un gollen Grotendöör.

Weertschop un Infrastruktur[ännern | Bornkood ännern]

Dat Dörp harr fröher en egene freewillige Füürwehr, de sik aver 1959 de Füürwehr in Wörpdörp anslaten hett.

Fleten Water hett de Oort 1964 kregen. 1991 is Seehusen ok an dat Afwaternett anslaten worrn.

Verkehr[ännern | Bornkood ännern]

De Dörpstraat dör Seehusen is de Kreisstraat 36, de in’n Süüdwesten an de K 10 geiht. De K 10 löppt in’n Noorden na Worpsweed un in’n Süden an de Landsstraat 133 un na Grasbarg. De L 133 wedder föhrt in’n Süüdwesten na Leendaal un Bremen un in’n Noordoosten na Tarms un Zeven.

De nächste Autobahn is de Autobahn 27 (Afsnidd BremenWasra). De Opfohrt 19 Horn-Leh liggt so 18 Kilometer in’n Süüdwesten von Seehusen an de Leendaler Heerstraat.

De nächsten Bahnhööv sünd so bi 18 Kilometer wied weg in’n Westen de Bahnhoff Oosterholt-Scharmbeek an de Bahnlien Bremen–Bremerhoben un in’n Süden de Bahnhoff Sao’ern an de Bahnlien Hamborg–Bremen. Op de Bahnlien Bremen–Tarms hett dat von 1900 bet 1956 Personenverkehr geven. De Bahnhoff Grasbarg weer in düsse Tied knapp dree Kilometer in’n Süden.

Scholen[ännern | Bornkood ännern]

De eerste School in Seehusen is 1805 grünnt worrn. Düsse Volksschool hett dat bet 1975 geven. Nadem de School dichtmaakt hett, gaht de Kinner ut Seehusen nu na de Grundschool Grasbarg.

Footnoten[ännern | Bornkood ännern]

  1. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 96
  2. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 556
  3. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 139
  4. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 160
  5. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 168
  6. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 144
  7. Inwahnertallen op gemeindeverzeichnis.de
  8. a b c Inwahnertallen op verwaltungsgeschichte.de

Weblenken[ännern | Bornkood ännern]

Commons-logo.svg Seehusen (Grasbarg). Mehr Biller, Videos oder Audiodateien to’t Thema gifft dat bi Wikimedia Commons.