Thebü

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Beverst
Inwahners:
Postleettall:	27616
Vörwahl:	04768
Geograafsche Laag:	53° 29′ N, 8° 57′ O

Thebü (hoochdüütsch Thebüe) is en Oort in de Gemeen Beverst in’n Landkreis Cuxhoben, Neddersassen. De Oort höört polietsch von öllers bi Frellsdorp mit bi.

Geografie

De Oort liggt op de Wersermünner Geest in en Rebeed mit veel Holt (Haasel in’n Noordwesten, Frellsdorpermöhlenholt in’n Noordoosten, de Mals un de Sünnerwoold in’n Süden) un enkelte Mooren. Dat Water ut dat Rebeed flütt af över den Ströhngraven hen na’n Frellsdorper Möhlenbeek.

De Naveröörd sünd Bokelah un dat Dörp Op de Hööv in’n Noorden, Nee Eversdörp, Heinschenwall un Hipst-Löh in’n Noordoosten, Hipst-Dörp un Sünnerwoold in’n Süüdoosten, Havekesch un Mals in’n Süden, Appeln un Abelhorst in’n Süüdwesten, Frellsdorp in’n Westen un Frellsdorpermöhlen un Drachel in’n Noordwesten.

Historie

Verwaltungsgeschicht

De Oort hett vör 1851 to’n Bezirk von dat Arvgericht Beverst (Huusvaagdie Oolluunbarg) in dat Gericht Beverst tohöört un denn von 1851 bet 1859 to dat Amt Beverst. 1859 is dat Amt Beverst oplööst worrn un de Oort keem an dat Amt Leh. Na 1885 weer dat in’n Kreis Geestmünn, is 1932 Deel von’n Kreis Wersermünn worrn un 1977 von’n Landkreis Cuxhoben.

Thebü hett von öllers bi Frellsdorp höört. De Gemeen Frellsdorp is an’n 1. November 2011 Deel von de Gemeen Beverst worrn.

Inwahnertall

Johr	Inwahners
1905-12-011. Dezember 1905	25 Lüüd, 4 Hüüs

Religion

Thebü is evangeelsch-luthersch präägt un höört to dat Kaspel von de Bethlehem-Kark in Hipst. Disse Kark is 1961 egenstännig worrn. Vörher hett de Oort to dat Kaspel von de Fabian-un-Sebastian-Kark in Beverst höört.

För de Kathoolschen is de Hillig-Hart-Jesu-Kark in Geestmünn tostännig.

Weertschop un Infrastruktur

Verkehr

Dör Thebü löppt de Kreisstraat 40, de in’n Westen na Frellsdorp un denn na Geestenseth an de Landsstraten L 128 un L 143 ran geiht. In’n Oosten geiht de K 40 in’n Landkreis Rodenborg in de K 144 över un na Hipst. Över de K 116 besteiht wieder in’n Oosten bi Örel Ansluss an de Bundsstraten B 71/B 74, de na Bremervöör föhrt. De L 128 löppt in’n Noorden na Beers un in’n Süden na Beverst an de B 71, de L 143 in’n Westen na Bremerhoben.

De nächste Autobahn is de Autobahn 27 (Afsnidd Bremen–Bremerhoben). De Opfohrten 8 Geestmünn un 9 Wulsdörp doot all beid so 23 Kilometer in’n Westen von Thebü liggen.

De nächste Bahnhoff is 2,5 Kilometer wied weg in’n Noordoosten de Bahnhoff Op de Hööv an de Bahnlien Bremerhoben–Buxthu.

Scholen

De Kinner ut Thebü gaht na de Grundschool Geestenseth. Bet 1976 sünd se na de Volksschool in Frellsdorp gahn.