Raisa eG
De Raisa eG is en landweertschopliche Genossenschaft in dat Werser-Elv-Dreeeck. De Seet is in Stood. Raisa höört to de Inkoopsgemeenschop AGRAVIS Raiffeisen AG.
Dat Ünnernehmen hett sik 2018 billt, as Stoder Saattucht un Raiffeisen-Worengenossenschaft Gnarrenborg dör Fusion tohoopgahn sünd.
De Genossenschaft hett üm un bi 2500 Maten, 434 Mitarbeiders[1] un hett in dat Geschäftsjohr 2016/2017 en Ümsatz von üm un bi 286 Milljonen Euro maakt.[2]
De Vörstand besteiht ut Axel Lohse (Spreker) un Ralf Löhden un Vörsitter von’n Opsichtsraad is Henning Ehlers (Stand Dezember 2017). De drüdde Vörstand, Hans-Jürgen Brunkhorst, is 2016 in Rohstand gahn.
Standöörd
[ännern | Bornkood ännern]Dat Ünnernehmen hett 17 Standöörd in’n Landkreis Stood (2× Stood, Gothenborg, Obbens, Bargst, Beekdörp, Brest-Aasp, 2× Freenbeek, Hammoh, 2× Harsfeld, 2× Himmelpoorten, Olendörp, Bützfleet un Wangersen), fiev in’n Landkreis Cuxhoben (Kumbarg, 2× Debst, Basbeek un Westersood), acht in’n Landkreis Horborg (Bookholt, Drennhusen, Heidenau, Hullnst, Jesborg, Ilsdörp, Ninndörp un Töst), teihn in’n Landkreis Rodenborg (Alfs, Breddörp, 3× Bremervöör, Öölm, Fintel, Örel, Sürsen un Zeven), twee in’n Landkreis Heidkreis (Snevern un Wessloh) un een in Hamborg (Finkwarder).[3]
Blangen dat Hauptgeschäft mit Produkten un Produkschoonsmiddels för de Bueree an 20 Standöörd bedrifft dat Ünnernehmen an 18 Standöörd Huus- un Goornmärkt, an twee Standöörd Bostoffhannels, an 22 Standöörd Tankstellen (dorvon söven mit Waschanlagen un twee Warksteden), an fiev Standöörd Floristik un een Café in Harsfeld. Tosätzlich gifft dat en Fodermiddelwark in Obbens, veer Kartuffellagerhüüs in Obbens, Beekdörp, Freenbeek un Harsfeld, den Tuchthoff in Gothenborg un de Vehvermarktung in Örel (Stand 2016).[3]
Historie
[ännern | Bornkood ännern]De Stoder Saattucht is an’n 14. Mai 1918 op Initiative von’n Landraad Franz Cornelsen grünnt worrn un hett toeerst Stoder Saatbovereen heten. De Hauptopgaav weer in de eerste Tied dat Anköpen un Tüchten von Saatgood. 1921 füng de egene Kartuffeltucht an.
1976 hett de Stoder Saattucht sik mit de Vereenigte Saattucht Ebstörp un de Saattucht Soltau-Bargen tohoopdaan un de Noordkartuffel Tuchtsellschop mbH grünnt, de nu för de Kartuffeltucht tostännig weer. 1992 is de Noordkartuffel Tuchtsellschop noch wedder mit de Kartuffeltucht Böhm tohoopgahn. Dör düsse Fusion hett sik de Europlant Plantentucht GmbH billt, an de de Stoder Saattucht nu een Sösstel von de Andelen höllt.
To’n 1. Juli 2009 is de Stoder Saattucht dör Fusion mit de Raiffeisen-Worengenossenschaft Öölm tohoopgahn.
To’n 1. Juli 2018 is de Saattucht mit de Raiffeisen-Worengenossenschaft Gnarrenborg (RWG) dör Fusion tohoopgahn. De RWG harr in dat Weertschopsjohr 2015/2016 en Ümsatz von 45 Millionen Euro. De Genossenschaft harr 800 Maten un 80 Mitarbeiders. Se hett söss Raiffeisen-Märkt un veer Tankstellen in de Öörd Ax, Gnarrenborg, Hu’e, Leendaal, Oosterholt, Tarmst un Wilst bedreven. Grünnt worrn is se 1924.
Op de Sellschopperversammlung an’n 24. November 2017 in Harsfeld is beslaten worrn, dat dat Ünnernehmen den ne’en Naam Raisa dragen schall, de sik ut Raiffeisen un Saattucht tohoopsett.[2] Grund för den ne’en Naam weer blangen de Fusion, dat dat Ünnernehmen al länger sülvs keen Saat mehr tüchten deit (düt Geschäft hett Europlant övernahmen).
Footnoten
[ännern | Bornkood ännern]- ↑ https://www.stader-saatzucht.de/unternehmen/
- ↑ a b Daniel Beneke: Saatzucht soll bald Raisa heißen, Stader Tageblatt an’n 24. November 2017
- ↑ a b https://www.stader-saatzucht.de/standorte/
Weblenken
[ännern | Bornkood ännern]
- Websteed von dat Ünnernehmen (hoochdüütsch)