Steenau (Land Wusten)

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Wuster Noordseeküst
Inwahners:
Postleettall:	27637
Vörwahl:	04741
Geograafsche Laag:	53° 45′ N, 8° 36′ O

Steenau (hoochdüütsch Steinau) is en Oort in de Gemeen Wuster Noordseeküst in’n Landkreis Cuxhoben, Neddersassen. De Oort höört polietsch von öllers bi Spiek mit bi un is vondaag binnen de Gemeen Deel von de Oortschop Noordholt.

Geografie

De Oort liggt in de Masch von Land Wusten. De Noordsee is veer Kilometer in’n Westen un de Geest von de Hoge Lieth een Kilometer in’n Oosten. Dat Water ut dat Rebeed flütt af över Gravens hen na’n Wallsgroov un na de Spieker Waterlöös.

De Naveröörd sünd Dieksenn in’n Noorden, Spieker Noordermarren un Knill in’n Noordoosten, Scharnst in’n Oosten, Hartingspecken un Spieker Südermarren in’n Süüdoosten, Booth in’n Süden, Spiek in’n Süüdwesten, Cappeler Olendiek in’n Westen un Sielhusen, Spieker Olendiek un de Wackelstraat in’n Noordwesten.

Historie

De Oort kummt 1357 as Stennowe toeerst in de Oorkunnen vör.

Verwaltungsgeschicht

De Oort hett vör 1852 to dat Steenauer Veerdel von dat Kaspel Spiek in dat Vaagdiegericht Land Wusten tohöört un denn von 1852 bet 1885 to dat Amt Dorum. Na 1885 weer dat in’n Kreis Leh. 1932 is dat Deel von’n Kreis Wersermünn worrn un 1977 von’n Landkreis Cuxhoben.

De Oort is as Deel von de Gemeen Spiek an’n 1. März 1974 mit de Gemeenreform in Neddersassen an de Gemeen Noordholt kamen. To’n 1. Januar 2015 is de Gemeen Noordholt oplööst un Deel von de ne’e Gemeen Wuster Noordseeküst worrn.

Inwahnertall

Johr	Inwahners
1871-12-011. Dezember 1871	21 Lüüd, 4 Hüüs

Religion

Steenau is evangeelsch-luthersch präägt un höört to dat Kaspel von de Georg-Kark in Spiek.

För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.

Weertschop un Infrastruktur

Vondaag sünd ok en Reeg Ünnernehmens in Steenau ansiedelt, ünner annern Raiffeisen Werser-Elv, de Kurverwaltung von de Gemeen Wuster Noordseeküst un en Filial von de Werser-Elv-Spoorkass.

Verkehr

Dör Steenau löppt de Kreisstraat 14, de in’n Oosten bi Wusterheid an de Landsstraat 135 ran geiht un in’n Süüdwesten na Spiek un an de K 68 ran. An’n Noordoostrand von Steenau geiht de K 74 in’n Noorden dör Dieksenn un na Noordholt.

De nächste Autobahn is de Autobahn 27 (Afsnidd Bremerhoben–Cuxhoben). De Opfohrt 3 Noordholt liggt so söss Kilometer in’n Süüdoosten von Steenau an de K 14.

De nächste Bahnhoff is so bi veer Kilometer wied weg in’n Noordoosten de Bahnhoff Noordholt an de Bahnlien Bremerhoben–Cuxhoben.