Wallsgroov
De Wallsgroov is en Waterloop in Land Wusten, de an’n Gravenwall langslöppt.[1] De Wallsgroov is dör Minschenhand anleggt worrn, üm dat Water ut dat Siedland von Land Wusten wegtoföhren. In de Masch liggt dat Siedland an’n Rand na de Geest sieder as dat Rebeed dichter bi de Küst. Wenn dat nu veel Regen geven hett un dor veel Water von de Geest dalkummt, denn mutt dit Water afföhrt warrn, dat dat Siedland nich afsüppt. De Wallsgroov weer dör denn Gravenwall indiekt. In de Oorkunnen is de Gravenwall toeerst in dat 14. Johrhunnert nawiest.
Dat Süüdenn von’n Wallsgroov na de Werser hen liggt in Bremerhoben bi Weddewarden. Dat weer fröher in’n Süden von dat Dörp Weddewarden, aver dör den Bo von dat Container-Terminal IV von’n Haven Bremerhoben in de Johren 2004 bet 2008 maakt de Wallsgroov nu en Knick na Noordwest un münnt nu eerst 1,5 Kilometer wieder an’t Noordenn von’t Container-Terminal in’n Noordwesten von dat Dörp. In’n Oosten von Weddewarden is de Münn von de Ne’e Au in’n Wallsgroov.
De Wallsgroov löppt in’n Oosten an Weddewarden, Dingen, Wremen un Mulsen langs na Noordoost to. Op dat Oostöver sünd de Öörd op de Geest Langen, Sievern un Holsseln. Bi Mulsen is de Wallsgroov mit de Misselwardener Waterlöös verbunnen.
Op de Maschsied sünd de nächsten Öörd Dorum un Cappel. Denn löppt de Wallsgroov dicht bi Millm langs, dat op dat Oostöver op’n Geestrand liggt, dör den Millmer Oortsdeel Specken.
De Wallsgroov wennt sik nu na Noordwest. Op de Maschsied liggt Spiek, op de Geestsied is Noordholt. Bi Spieker Neefeld drippt de Wallsgroov den op den olen Verloop von de Noordseeküst.
In dissen Noorddeel is vondaag de Spieker Waterlöös düüdlich wichtiger as Waterafloop as de Wallsgroov.