Spieker Waterlöös

Vun Wikipedia

De Spieker Waterlöös is en Waterloop in Land Wusten (Landkreis Cuxhoben), de in de Noordsee münnt.

De Waterlöös fangt bi Grotenbüttel twüschen Cappel un Millm an un is dor ok mit de Cappler Waterlöös verbunnen. Se flütt groff na Noorden un an Bosenbüttel langs. Se geiht denn twüschen Spiek op dat Westöver un Booth, Hartingspecken un den Spieker Südermarren op dat Oostöver dör. De Bahnlien Bremerhoben–Cuxhoben un de Kreisstraat 14 (Wuster Straat) loopt hier mit Brüggen över de Waterlöös weg, de denn na Noordwesten dreiht.

Op de Oostsied kaamt nu Steenau, de Spieker Noordermarren, Dieksenn un de Wackelstraat un op de Westsied Sielhusen un Spieker Olendiek. Bevör 1636 dat Wuster Neefeld indiekt worrn is, is de Waterlöös hier in de Noordsee münnt. Vondaag flütt se aver noch 2,5 Kilometer wieder dör dat Neefeld, vörbi an de Hööv Pompdamm un Halvmaand un münnt in Spieker Neefeld dör en Siel in de Noordsee. Kort vör de Münn is de Waterlöös över de Spiek-Neefeller Waterlöös ok mit de hüdige Münn von’n Oxter Beek verbunnen.

De Wallsgroov, de in en Afstand von üm un bi een Kilometer in’n Oosten jümmer groff parallel to de Spieker Waterlöös löppt, is vondaag in dat Neefeld ok mit de Waterlöös verbunnen.