Wackelstraat

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Wuster Noordseeküst
Inwahners:
Postleettall:	27637
Vörwahl:	04741
Geograafsche Laag:	53° 46′ N, 8° 35′ O

De Wackelstraat (hoochdüütsch Wackelstraße) is en lütten Oort in de Gemeen Wuster Noordseeküst in’n Landkreis Cuxhoben, Neddersassen. Binnen de Gemeen höört de Wackelstraat to de Oortschop Noordholt. De Oort höört polietsch von öllers bi Spiek mit bi.

Geografie

De Oort liggt in de Masch von Land Wusten. De Noordsee liggt good dree Kilometer in’n Westen. Dat Water ut dat Rebeed warrt över de Spieker Waterlöös afföhrt.

De Naveröörd sünd Noordholt in’n Noordoosten, Dieksenn in’n Oosten, de Spieker Noordermarren in’n Süüdoosten, Steenau un Spiek in’n Süden, Sielhusen in’n Süüdwesten un de Spieker Olendiek in’n Westen.

Historie

Verwaltungsgeschicht

De Oort weer vör 1852 in dat Spieker Noorderveerdel von dat Kaspel Spiek un hett to dat Vaagdiegericht Land Wusten tohöört. Von 1852 bet 1885 weer dat in dat Amt Dorum un denn in’n Kreis Leh. 1932 is dat Deel von’n Kreis Wersermünn worrn un 1977 von’n Landkreis Cuxhoben.

De Gemeen Spiek is an’n 1. März 1974 mit de Gemeenreform in Neddersassen Deel von de Gemeen Noordholt worrn. To’n 1. Januar 2015 is de Gemeen Noordholt oplööst un dor is tohoop mit de Samtgemeen Land Wusten de ne’e Gemeen Wuster Noordseeküst von worrn.

Inwahnertall

Johr	Inwahners
1871-12-011. Dezember 1871	9 Lüüd, 2 Hüüs

Religion

De Wackelstraat is evangeelsch-luthersch präägt un höört to dat Kaspel von de Georg-Kark in Spiek.

För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.

Weertschop un Infrastruktur

Verkehr

De Wackelstraat is över lüttjere Straten anbunnen an de Kreisstraat 68 un över den Spieker Karkweg an de K 14. De K 68 löppt in’n Noordoosten na Noordholt un an de Landsstraat 135 ran un in’n Süüdwesten na Padingbüddel un Misselwarden. De K 14 is in’n Westen ok wedder an de K 68 anslaten un löppt in’n Oosten na de L 135. De L 135 löppt in’n Noorden na Olenwoold un Cuxhoben un in’n Süden över Millm un Sievern na Langen un Bremerhoben.

De nächste Autobahn is de Autobahn 27 (Afsnidd Bremerhoben–Cuxhoben). De Opfohrt 3 Noordholt liggt negen Kilometer in’n Süüdoosten von de Wackelstraat an de K 14.

De nächste Bahnhoff is so bi veer Kilometer wied weg in’n Noordoosten de Bahnhoff Noordholt an de Bahnlien Bremerhoben–Cuxhoben.