Dieksenn

Vun Wikipedia
Zur Navigation springen Zur Suche springen
Wapen/Flagg Koort

Wapen vun Dieksenn

Dieksenn
Laag vun Dieksenn in Düütschland
Basisdaten
Bundsland: Neddersassen
Landkreis: Cuxhoben
Gemeen: Wuster Noordseeküst
Inwahners:
Postleettall: 27637
Vörwahl: 04741
Geograafsche Laag:
Koordinaten:53° 46′ N, 8° 35′ O
53° 46′ N, 8° 35′ O

Dieksenn (hoochdüütsch Deichsende) is en Dörp in de Gemeen Wuster Noordseeküst in’n Landkreis Cuxhoben, Neddersassen. Binnen de Gemeen höört de Oort to de Oortschop Noordholt.

Geografie[ännern | Bornkood ännern]

Dieksenn liggt op en lütten Geestsporn as Utlöper von de Hoge Lieth, de in de Masch von Land Wusten rinreckt. Dat Water ut dat Rebeed flütt af över den Wallsgroov.

De Naveröörd sünd Noordholt in’n Noorden, Wusterheid in’n Oosten, Knill un Scharnst in’n Süüdoosten, Spieker Noordermarren un Spiek in’n Süden, Spieker Olendiek in’n Süüdwesten un Spieker Neefeld in’n Noordwesten.

Historie[ännern | Bornkood ännern]

Sien Naam hett de Oort dor von, dat de ole Diek, de dat Land Wusten vör de Floden von de Noordsee schulen dee, hier op den Rand von de högere Geest stöten dee un dormit toenn weer. Eerst as in dat 17. Johrhunnert dat Neefeld indiekt worrn is, leeg de Hauptdieklien denn twee Kilometer wieder in’n Westen.

In’n Eersten Weltkrieg sünd twölv Soldaten ut Dieksenn fullen oder vermisst un in’n Tweten Weltkrieg 64.[1]

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Spiek in’n Kanton Dorum höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett von 1739 bet to’n 5. Juni 1819 to dat Amt Noordholt tohöört un denn bet 1852 to dat Vaagdiegericht Land Wusten. Von 1852 bet 1885 weer dat in dat Amt Dorum un denn in’n Kreis Leh. 1932 is dat Deel von’n Kreis Wersermünn worrn un 1977 von’n Landkreis Cuxhoben.

Dieksenn hett in dat 19. Johrhunnert noch mit Noordholt tohoop een Gemeen billt, weer later denn aver egenstännige Gemeen.

1924 müss Dieksenn Land afgeven, as Wusterheid ut Rebeed von verscheden Gemenen nee grünnt worrn is. An’n 1. Juli 1967 is de Oort denn aver mit Noordholt un Wusterheid to de ne’e, gröttere Gemeen Noordholt tohoopslaten worrn, de 1970 denn noch Wanhöden un 1974 Spiek opnahmen hett. To’n 1. Januar 2015 is de Gemeen Noordholt oplööst un dor is tohoop mit de Samtgemeen Land Wusten de ne’e Gemeen Wuster Noordseeküst von worrn. Dat Rebeed von de vörherige Gemeen Noordholt billt nu en polietsche Oortschop binnen de Gemeen Wuster Noordseeküst un hett en egen Oortsraad un Oortsbörgermeester.

Inwahnertall[ännern | Bornkood ännern]

Johr Inwahners
1791-00-001791[2] 28 Füürsteden
1812-00-001812[3] 140
1824-00-001824[4] 29 Füürsteden
1848-00-001848[5] 154 Lüüd. 38 Hüüs
1871-12-011. Dezember 1871[6] 188 Lüüd. 41 Hüüs
1910-12-011. Dezember 1910[7] 342
1925-00-001925[8] 547
1933-00-001933[8] 541
1939-00-001939[8] 645

Religion[ännern | Bornkood ännern]

Dieksenn is evangeelsch-luthersch präägt un höört siet den 1. Januar 1968 to dat Kaspel von de Kark to’n goden Heer in Noordholt. Vörher hett de Oort to de Georg-Kark in Spiek höört.

För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.

Wapen[ännern | Bornkood ännern]

Dat Wapen von Dieksenn wiest baven op blauen Grund halv en gollen Aadler mit roden Snavel un ünnen en dwars deelt Feld, dat baven vörn op sülvern Grund en gröön Kleverbladd wiest un ünnen achtern op grönen Grund en sülvern Kleverbladd.

Kultur[ännern | Bornkood ännern]

En Denkmaal för de Fullenen ut de twee Weltkrieg’ steiht in Dieksenn an de Dörpstraat.

Weertschop un Infrastruktur[ännern | Bornkood ännern]

Dieksenn hett en egene freewillige Füürwehr, de 1902 grünnt worrn is.

Verkehr[ännern | Bornkood ännern]

Dör Dieksenn löppt de Kreisstraat 74, de in’n Noorden an de K 68 ran geiht un in’n Süden an de K 14. De K 68 geiht in’n Noordoosten na’n Noordholter Bahnhoff un an de Landsstraat 135 ran. Von de K 68 geiht na Noorden ok de K 7 af, de na Ox un Berensch löppt. De K 14 in’n Süden gifft Ansluss na Spiek.

De nächste Autobahn is de Autobahn 27 (Afsnidd BremerhobenCuxhoben). De Opfohrt 3 Noordholt liggt so acht Kilometer in’n Süüdoosten von Dieksenn an de K 14.

De nächste Bahnhoff is good twee Kilometer wied weg in’n Noordoosten de Bahnhoff Noordholt an de Bahnlien Bremerhoben–Cuxhoben.

Footnoten[ännern | Bornkood ännern]

  1. http://www.denkmalprojekt.org/dkm_deutschland/nordholz-deichsende_wk1u2_ns.htm
  2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 55
  3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
  4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 128
  5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 147
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 154
  7. Inwahnertallen op gemeindeverzeichnis.de
  8. a b c Inwahnertallen op verwaltungsgeschichte.de

Weblenken[ännern | Bornkood ännern]

Commons-logo.svg Dieksenn. Mehr Biller, Videos oder Audiodateien to’t Thema gifft dat bi Wikimedia Commons.